नवलपरासी ।
नवलपरासी ९बर्दघाट सुस्तापूर्व०को हुप्सेकोट गाउँपालिकाले ७६ जना सुत्केरीलाई रु पाँच हजारका दरले पोषण खर्च उपलब्ध गराएको छ ।चालु आर्थिक वर्ष २०८२(८३ को हालसम्म ‘सुत्केरी स्याहार पोषण खर्च कार्यक्रम’मार्फत गाउँपालिकाभित्रका ७६ जना सुत्केरीलाई रकम हस्तान्तरण गरिएको हो ।
सुत्केरी भएपछि आमा र नवजात शिशुको स्वास्थ्य तथा पोषणमा सहयोग पुगोस् भन्ने उद्देश्यले पोषण खर्च दिने कार्यक्रम सञ्चालन गरिएको हुप्सेकोट गाउँपालिका अध्यक्ष लक्ष्मीदेवी पाण्डेले बताइन् । “सुत्केरी आमालाई आर्थिक सहायता, पोषण र स्याहारको खाँचो विशेष रूपमा महसुस हुन्छ यिनै आवश्यकतालाई बुझेर गाउँपालिकाका तर्फबाट केही भए पनि रकम दिने व्यवस्था मिलाइएको हो,” उनले भनिन् ।
हुप्सेकोट गाउँपालिकाभित्र रहेका सबै वर्ग समुदायभित्रका महिलालाई सुत्केरी समयमा आधारभूत पोषणको कमी नहोस् भन्ने उद्देश्यले कार्यक्रम सञ्चालन गरिएको उनको भनाइ छ । सुत्केरी भएपश्चात् बैङ्क खातामा रकम पठाइने भए तापनि तत्कालको गर्जो सापटीमार्फत चलाउन सक्ने आधार पोषण खर्च कार्यक्रमले सुनिश्चित गरेको अध्यक्ष पाण्डेले बताइन् ।
“यो कार्यक्रममार्फत मातृ र शिशु मृत्यु दर घटाउने हाम्रो प्रयास हो,” उनले भनिन्, “हामी चाहन्छौँ सुत्केरी महिला पोसिलो आहार खान सकून्, आफूलाई स्याहार गर्न सकून् ।” गाउँपालिकाले यो कार्यक्रमलाई मातृ स्वास्थ्यसँगै महिला आत्मनिर्भरताको पनि एउटा पाइलाको रूपमा लिएको हुप्सेकोट गाउँपालिकाका प्रमुख प्रशासकीय अधिकृत वेदहरि अधिकारीले बताए ।
“हामीले पोषण खर्चका साथै स्वास्थ्य सल्लाह, नियमित जाँच, र भिटामिन वितरणजस्ता सेवा पनि सँगसँगै प्रवाह गरिरहेका छौँ”, उनले भने । हुप्सेकोट गाउँपालिकाभित्र स्थायी बसोबास गरेका महिला गर्भवती अवस्थामा चार पटक स्वास्थ्य संस्थामा परीक्षणका लागि गएको, स्वास्थ्य संस्थामा सुत्केरी भएको र बच्चाको जन्म दर्ता गरेको प्रमाण पेस गरेपछि गाउँपालिकाले रकम उपलब्ध गराउने गरेको छ ।
यो सहायता रकम महिला आफैँले प्रयोग गर्नसक्ने व्यवस्था गरिएको हुप्सेकोट गाउँपालिकाका स्वास्थ्य शाखा प्रमुख कृष्णप्रसाद सापकोटाले बताए ।“कार्यक्रममार्फत गर्भवतीको नियमित स्वास्थ्य परीक्षण, अस्पतालमा नै सुत्केरी हुने अवस्था र नवजात शिशुको समयमै जन्म दर्ता गराउने बानीको विकास भएको पाएका छौँ,” उनले भने, “एउटै कार्यक्रमले मातृ शिशुको स्वास्थ्य सँगसँगै बच्चाको जन्म दर्ताको सुनिश्चितता गरेको छ ।” रासस
प्रतिक्रिया दिनुहोस्