26 May 2024  |   आइतवार, जेष्ठ १३, २०८१

प्लाइउडको भारत निकासी रोकिने डर

मिसनटुडे संवाददाता
प्रकाशित मितिः सोमवार, फाल्गुन ७, २०८०  

नेपालगन्ज भन्सार नाका मात्रै नभई देशभरबाट उच्च निकासी हुने वस्तुको सूचीमा रहेको प्लाइउडको गुणस्तर प्रमाणका नाममा घुमाउरो पारामा भारतले नेपाली प्लाई रोक्न खोजेको उद्योगीहरू बताउँछन् ।

कमल डाँगी । नेपालगन्ज ।
पछिल्लो समय भारतमा अत्यधिक मात्रामा नेपाली प्लाइउड निर्यात भएसँगै उद्योगीहरूमा उत्साह जगाएको थियो । तर यसरी धमाधम निर्यात भइरहेको नेपाली प्लाइउडमा बाधा उत्पन्न हुने गरी भारतले गुणस्तर प्रमाण चिह्नको झमेला झिकेपछि उद्योगीहरूमा तनाव सिर्जना भएको छ ।

यदि गुणस्तर प्रमाण चिह्नका नाममा निर्यात रोकिने अवस्था आयो भने ६० प्रतिशत नेपाली प्लाइउड उद्योग बन्द हुन सक्ने नेपाल प्लाइउड संघका पूर्वअध्यक्ष चम्पालाल बोथरा बताउँछन् । नेपालबाट चालु आर्थिक वर्षको पुस मसान्तसम्म ३ अर्ब रूपैयाँबराबरको प्लाइउड निर्यात भएको थियो ।

भन्सार विभागले हालै सार्वजनिक गरेको तथ्यांक अनुसार नेपालले यस अवधिमा २ अर्ब ८९ करोड २ लाख रूपैयाँबराबरको प्लाइउड भारततर्फ निर्यात गरेको थियो । नेपालगन्जका करिब आधा दर्जन प्लाई उद्योगले भारतमा प्लाई निर्यात गर्दै आएका छन् । नेपालगन्ज भन्सार कार्यालयका अनुसार, यो नाका हुँदै चालु आवको छ महिनामा करिब १४ करोडको प्लाई निर्यात भएको छ ।

खासगरी नेपालमा उत्पादित उत्तीसका बिरुवाहरूबाट निर्मित प्लाइउडको माग भारतीय बजारमा प्रशस्तै रहेको उद्योगी व्यवसायीहरू बताउँछन् । जसका कारण पूर्वी र पश्चिमी दुवै तर्फका नाकाहरूबाट भारततर्फ गत आर्थिक वर्षमा मात्रै ६० लाख क्युबिक मिटर बढी प्लाइउड निर्यात भएको पाइएको हो । धेरै निर्यात हुने ३० वस्तुभित्रको सूचीमा परेको प्लाइउड पछिल्लो ५ महिनामा मात्रै २७ लाख क्युबिक मिटर प्लाइउड निर्यात भएको पाइएको छ ।

खासगरी भारतीय बजारमा बढेको प्लाइउडको मूल्यका कारण नेपालमा पाइने सस्तो मूल्यको प्लाइउडको निर्यात बढेको पाइएको छ । भारतमा प्लाइउडको कच्चा पदार्थको मूल्य बढ्नु, नेपालको निर्माण क्षेत्रमा सुस्तता आउनु र प्लाइउडलाई पनि निर्यातमा नगद अनुदान पाइने वस्तुको सूचीमा समावेश गरिनुले नेपालबाट हुने यसको निर्यात लगातार बढिरहेको नेपाल प्लाइउड उत्पादक संघका पूर्वअध्यक्ष बोथरा बताउँछन् ।

नेपालबाट जाने सस्तो मूल्यको प्लाइउडको खपत भारतका लखनउ, कानपुर, दिल्ली, आग्रा, देहरादुनलगायतका बजारसम्म हुने गरेको छ ।
यसरी नेपाली प्लाइउड धमाधम निर्यात भएका बेला भारतले भने निहुँ खोजेको छ । नेपालबाट यसको निर्यात बढेको जानकारी पाएसँगै भारतले आगामी फेब्रुअरी २८ देखि लागू हुनेगरी प्लाइउड आयातमा भारतीय गुणस्तर प्रमाण (आइएसआई) अनिवार्य गरेको छ ।

हालसम्म बिनाआइएसआई प्लाइउड भारततर्फ निर्यात गरिरहेका नेपाली उद्योगीलाई यसले अवरोध गर्ने प्लाइउड संघले जनाएको छ । भारतले अब आइएसआई खोज्ने भएपछि नेपालबाट जाने प्लाइउडमा केही समस्या सिर्जना हुने भएको छ ।

भारत सरकारले गत भदौ १४ मा राजपत्रमा सूचना प्रकाशित गर्दै आगामी फेब्रुअरी २८ पछि प्लाईउडमा आइएसआई प्रमाण अनिवार्य गरेको हो । यसपश्चात नेपाली प्लाइउड उद्योगीले नेपालको उद्योग मन्त्रालयसँग विभिन्न चरणमा छलफल गरेर यसको सहजीकरणको पहल गरिदिन आग्रह गरेको छ ।

 

प्रकाशित मितिः सोमवार, फाल्गुन ७, २०८०     9:36:17 AM  |