17 April 2024  |   बुधबार, बैशाख ५, २०८१

बर्दिया निकुञ्जमा साढे १४ हजारले गरे अवलोकन

मिसनटुडे संवाददाता
प्रकाशित मितिः आइतवार, माघ ७, २०८०  

नेपालगन्ज।
‘वाइल्डलाइफ टुरिजम’का लागि विश्वमै नाम कमाएको बर्दिया राष्ट्रिय निकुञ्जमा आन्तरिक तथा बाह्य पर्यटकको संख्या बढ्दै गएको छ । आर्थिक वर्ष २०८०÷८१ को ५÷६ महिना अर्थात पुसभित्र मात्रै नेपाली र विदेशीसहित १४ हजार ५ सय ४९ जनाले निकुञ्ज अवलोकन गरेका छन् । यही अवधिमा गत वर्ष ९ हजार ६ सय ९३ जनाले निकुञ्ज अवलोकन गरेका थिए ।

निकुञ्जले दिएको जानकारी अनुसार चालु आवको पुस मसान्तसम्म आन्तरिक पर्यटक ११ हजार ३९, सार्क देशका ६ सय ५६, तेस्रो देशका २८ सय ५४ ले बर्दिया राष्ट्रिय निकुञ्ज अवलोकन गरेका छन् । यही ६ महिनाको अवधिमा गत वर्ष नेपाली ६ हजार ५ सय ४१, सार्क ५ सय १, अन्य २ हजार ६ सय ५१ जम्मा ९ हजार ६ सय ९३ जना पर्यटक भित्रिएका थिए । गत वर्षभन्दा यसपटक दोब्बर आन्तरिक पर्यटकले निकुञ्ज अवलोकन गरेका छन् ।

बर्दिया राष्ट्रिय निकुञ्ज बाघ संरक्षणका लागि प्रख्यात छ । पूर्णतया तराई क्षेत्रमा रहेको यस राष्ट्रिय निकुञ्ज स्थापनाको प्रमुख उद्देश्य नै बाघको संरक्षण भए पनि हात्ती, गैँडा, बाह्रसिंगा, घडियाल गोही, डल्फिन जस्ता लोपोन्मुख वन्यजन्तुहरू यहाँ संरक्षित छन् । बर्दिया निकुञ्जमा तिनै लोपोन्मुख वन्यजन्तु हेर्न पर्यटक पुग्ने गर्दछन् ।

बर्दिया राष्ट्रिय निकुञ्जका प्रमुख डा. अशोककुमार रामले पर्यटकको संख्यासमेत बढ्न थालेको बताए । विशेषगरी पर्यटकहरू बर्दिया बाघ हेर्न नै आउने गर्छन् । बर्दिया राष्ट्रिय निकुञ्ज भ्रमणका लागि आउने धेरै पर्यटक बाघ देखेरै फर्किने गरेका छन् ।

यस्तै, बर्दिया पर्यटनका हिसाबले समेत महत्वपूर्ण मानिन्छ । बर्दियाको पर्यटन प्रवद्र्धनका लागि हरेक पालिकाहरूले विशेष ध्यान दिन थालेका छन । संरक्षणका हिसाबबाट पनि बर्दिया अगाडि नै रहेको छ । बर्दियाका स्थानीयबासीहरूको सहयोगमा संरक्षण कार्यमा सफलता हासिल गर्न सकिएको निकुञ्जले जनाएको छ ।

प्रकाशित मितिः आइतवार, माघ ७, २०८०     8:29:00 AM  |