17 April 2024  |   बुधबार, बैशाख ५, २०८१

विशेष साइतमा ओमकारेश्वर शिव मन्दिरमा लघुरुद्री पाठ

मिसनटुडे संवाददाता
प्रकाशित मितिः शुक्रबार, माघ ५, २०८०  

धर्म गौतम ।कोहलपुर।
कोहलपुर नगरपालिका–१२ मसुरीखेतमा रहेको ओमकारेश्वर शिव मन्दिरमा लघुरुद्री सञ्चालन हुने भएको छ । पाँच सय वर्षपछि माघ ८ गते विशेष साइतको दिन परेकाले सो दिन शिवको आराधनसहित लघुरुद्री र जलधारा गर्न लागिएको मन्दिर व्यवस्थापन समितिका अध्यक्ष भीम खरेलले बताए ।

सो दिन सामूहिक लघुरुद्री आयोजना गरिने र श्री रामजानकी मन्दिर राधाकृष्ण भागवत आश्रम चप्परगौढीका ब्रह्चारी वटुकहरूद्वारा सस्वर समवेत रूपमा रुद्राभिषेकको पाठ हुने आयोजकले जनाएको छ । कर्ताले छुट्टाछुट्टै पूजा गर्न चाहेमा त्यसको समेत व्यवस्था मिलाइएको अध्यक्ष खरेलले जानकारी दिए । त्यसका लागि कर्ताले बाल्टी, बाटा, कलश, लोटा, पाँच कटौरी, शंख, घण्टी, दुई थाल, दुना टपरी, चन्दन, अक्षता आदि सामग्रीको आफैँ व्यवस्था गर्नुपर्नेछ । अन्यथा सबैको साझा पूजा मूल मन्दिरमा हुने पण्डित हरिहरप्रसाद अर्यालले जानकारी दिए ।

कर्ता बस्ने व्यक्तिले लघुरुद्री गर्दा १ हजार १ सय शुल्क तिर्नुपर्नेछ । यसका साथै भेटी तीनदेखि चार सयसम्म रहने र सोभन्दा बढी दान गर्न चाहने भक्तजनले आफ्नो इच्छाअनुसार दिन सक्नेछन् । पाँच सय वर्षपछि आएको यो अवसरमा सहभागी भएर यस धार्मिक कार्यलाई सफल बनाउन सबैले सहयोग गर्नुपर्ने मन्दिरका पूजारी लीलाराम शर्माले बताए ।

ओमकारेश्वर मन्दिरको भौतिक संरचना निर्माणका लागि मन्दिर व्यवस्थापन समितिको सक्रियतामा यसअघि २०७९ पुस २५ देखि ३ माघसम्म महायक्ष सञ्चालन भएको थियो ।

प्रकाशित मितिः शुक्रबार, माघ ५, २०८०     10:18:57 AM  |