17 April 2024  |   बुधबार, बैशाख ५, २०८१

बैजनाथ महोत्सवको तयारी तीव्र

मिसनटुडे संवाददाता
प्रकाशित मितिः बिहिबार, माघ ४, २०८०  

बाँके।
प्रथम बैजनाथ तथा छैटौं प्रादेशिक औगोगिक लघु, घरेलु तथा कृषि, प्रविधि, व्यापार एवम् पर्यटन महोत्सव २०८० को तयारी तीव्र पारिएको छ ।
नेपाल घरेलु तथा साना उद्योग महासंघ बैजनाथको आयोजनामा माघ १० गतेदेखि हुन गइरहेको महोत्सवको तयारी तीव्र पारिएको हो । बुधबार आयोजकले पत्रकार सम्मेलन गरेर महोत्सवका लागि आवश्यक तयारी अगाडि बढाइएको जानकारी दिएको थियो ।

माघ १० गतेदेखि २१ गतेसम्म बैजनाथ गाउँपालिका–५ स्थित कोहलपुर न्युसिटीमा महोत्सवको आयोजना गर्न लागिएको प्रचारप्रसार संयोजक सुमन विश्वकर्माले जानकारी दिए । महोत्सव सञ्चालनका लागि सम्बन्धित निकायबाट अनुमति प्राप्त भएसँगै तयारी अगाडि बढाइएको उनले बताए । ‘कृषि, पर्यटन, उद्योग र उत्पादन संस्कृतिको पहिचान ः विकास र समृद्वि बैजनाथको अभियान’ भन्ने मूल नाराका साथ बैजनाथमा पहिलोपटक महोत्सव गर्न लागिएको प्रचारप्रसार संयोजक विश्वकर्माले दाबी गरे ।

महोत्सवले बैजनाथमा रहेका कला, संस्कृति, भेषभूषा, मौलिक तथा सांस्कृतिक महत्व बोकेका विविधतायुक्त झाँकी, बाजा, परम्परागत पेसा, सीपलगायतका कुराहरूलाई राष्ट्रिय स्तरमा पहिचान सहयोग गर्ने महासंघ बैजनाथका अध्यक्ष दुर्गाप्रसाद पौडेलले जानकारी दिए ।
उनका अनुसार महोत्सवमा २ सय वटा नवीनतम् प्रविधिजन्य उत्पादनहरू, महिलाद्वारा सञ्चालित उद्यम तथा स्थानीय स्तरमा उत्पादित बस्तुहरू प्रमुख आकर्षणका रूपमा रहनेछन् ।

महोत्सवका मुख्य आकर्षणहरूमा राष्ट्रिय स्तरका लघु घरेलु तथा साना उद्योगहरूबाट उत्पादित बस्तु एवं सामग्रीहरू र लुम्बिनी प्रदेशको मौलिक कला संस्कृति, कृषि उत्पादन एवं प्रविधिको, स्थानीय पर्यटकीय स्थलको जानकारीमूलक र महिला उद्यमीद्वारा उत्पादित हस्तकलाका सामग्री एवं बस्तुहरूको प्रदर्शनी रहेका छन् ।

त्यसैगरी, सांस्कृतिक तथा मनोरञ्जनात्मक क्रियाकलापहरू, थारू परिकार तथा सम्बन्धित सांस्कृतिक झाँकीहरू, स्थानीय तथा राष्ट्रिय कलाकारहरूको सांस्कृतिक प्रस्तुतिसमेत रहेको आयोजक घरेलु महासंघ बैजनाथले जनाएको छ । स्थानीय उत्पादनलाई महोत्सवमा पहिलो प्राथमिकता दिइने आयोजक घरेलु महासंघ बैजनाथका महासचिव कमल सुवेदीले जानकारी दिए ।

महोत्सवमा आउने राष्ट्रिय कलाकारहरूको करिब टुङ्गोसमेत लागिसकेको उनले बताए । महोत्सवको सह–आयोजकमा वडा नम्बर ५ रहेको छ भने संरक्षणमा बैजनाथ गाउँपालिका रहेको छ । व्यवस्थापन भने जय माता दी एम्युजमेन्ट एन्ड इभेन्ट म्यानेजमेन्ट प्रालि बुटवलले गर्नेछ ।
१२ दिनसम्म सञ्चालन हुने महोत्सवको २ लाख बढी दर्शकहरूले अवलोकन गर्ने लक्ष्य राखिएको आयोजक नेपाल घरेलु तथा साना उद्योग महासंघ बैजनाथले जनाएको छ ।

प्रकाशित मितिः बिहिबार, माघ ४, २०८०     9:40:04 AM  |