20 May 2024  |   सोमवार, जेष्ठ ७, २०८१

वुड प्रदर्शनीमा शिखर प्लाईको सहभागिता

मिसनटुडे संवाददाता
प्रकाशित मितिः आइतवार, पुस २२, २०८०  

नेपालगन्ज।
भृकुटीमण्डपमा शुक्रबारदेखि सुरु भएको ‘नवौँ नेपाल वुड अन्तर्राष्ट्रिय प्रदर्शनी’ मा नेपालगन्जको शिखर प्लाइउड उद्योगले पनि सहभागिता जनाएको छ । उक्त प्रदर्शनीमा शिखर प्लाइउड र शिखर केबलले उत्पादन गरिएका सामग्रीसमेत राखिएको छ ।प्लाई र केबल उत्पादनमा चर्चित समूह शिखर ग्रुप २५औं वर्ष पुरानो हो ।

नेपालगन्जमा स्थापना भएको यो समूहले शिखर प्लाई र केबल उत्पादन गर्दै आएको छ । शिखर समूहले पछिल्लो समय भारमा समेत प्लाइउड निर्यात सुरु गरेको छ । मिडिया स्पेस सोलुसन्स प्रालि र भारतको फ्युचरेक्स ट्रेड फेयर एन्ड इभेन्ट्सले प्रदर्शनीको आयोजना गरेको हो । प्रदर्शनीमा काठबाट निर्मित सामग्री, भवनको आन्तरिक साजसज्जाका सामग्रीलगायत वस्तु राखिएका छन् ।

प्रदर्शनीको सहरी विकास मन्त्री सीता गुरुङले पनि अवलोकन गरेकी छन् । सो क्रममा मन्त्री गुरुङले स्वदेशी वस्तुको प्रवर्धन गर्न स्वदेशी उत्पादनको प्रयोगमा जोड दिनुपर्ने बताइन् । उनले नेपालको उत्पादनलाई प्रवर्धन गर्ने नीति सरकारले लिएको भए पनि त्यसको प्रभावकारी कार्यान्वयन भने हुन नसकेको स्वीकार गरिन् ।

सार्वजनिक निकायमा स्वदेशी वस्तुको उपयोग गर्नेसम्बन्धी निर्देशिका, २०७१ जारी भएयता सार्वजनिक निकायले आफूले उपयोग गर्ने वस्तु स्वदेशभित्रै उत्पादित हुनुपर्ने व्यवस्था छ । स्वदेशी उद्योग तथा व्यवसायको प्रवर्धनका लागि यस्तो निर्देशिका ल्याइएको भए पनि त्यसको कार्यान्वयनमा भने समस्या रहेको उनको भनाइ छ ।

प्रकाशित मितिः आइतवार, पुस २२, २०८०     8:25:20 AM  |