पूजापाठ गरी महोत्सव स्थल छनोट

बाँसगढी।
छैटौं बाँसगढी औद्योगिक, कृषि, पर्यटन व्यापार मेला तथा बर्दिया माघ महोत्सवको महोत्सवस्थल छनोट गरिएको छ । मंगलबार वैदिक विधिअनुसार पूजापाठ गरी महोत्सवस्थलमा कार्यारम्भ गरिएको हो ।

महोत्सवलाई बिनाबिघ्न बाधा र सफलताका साथ सम्पन्न गर्ने उद्देश्यका साथ लागि पूजापाठ गरी कार्य शुभारम्भ गरिएको बाँसगढी उद्योग वाणिज्य संघका अध्यक्ष बद्रीनाथ बरालले जानकारी दिए । औपचारिक शुभारम्भपछि महोत्सवस्थलमा सरसफाइलगायतका काम गरिने उनले जानकारी दिए ।

यही पुस २९ गतेदेखि माघ ९ गतेसम्म सञ्चालन हुने बर्दिया माघ महोत्सवमा थारू पहिचानसहितको डब्नीभिराउ लगायतका कार्यक्रम हुनेछन् । साथै महोत्सवमा बर्दिया आइडलको समेत घोषणा गरिने अध्यक्ष बरालले बताए । उनले कार्यक्रममा सहभागिताका लागि टिम दर्ता गर्न समूह तथा क्लबहरूलाई आग्रहसमेत गरे ।