मिसनटुडे संवाददाता
प्रकाशित मितिः सोमवार, पुस ९, २०८०
नेपालगन्ज।
लागत मूल्यभन्दा निकै सस्तोमा अण्डा बिक्री गर्न बाध्य भएका अण्डा उत्पादक किसानले लागत मूल्य पाउन थालेका छन् । अण्डाको बजारमूल्य बढेसँगै उनीहरूलाई केही राहत मिलेको हो । एक साताअघि अण्डाको मूल्य प्रतिक्यारेट ३ सय ७० देखि ३ सय ९० भए पनि आइतबार मूल्य बढेको छ ।
आइतबादेखि अण्डाको मूल्य प्रतिक्यारेट ४ सय २० देखि ४ सय ४० सम्म पुुगेको छ । बाँकेमा उत्पादन कमै हुने भएकाले यहाँका व्यापारीले अन्य जिल्लाबाट अण्डा ल्याउने गरेका छन् । विगतमा भएको नोक्सान र बैंक ऋण घटाउन भने यो मूल्यले अझै नधान्ने किसानको भनाइ छ ।
सबै खर्च जोड्दा अहिले अण्डाको मूल्य प्रतिगोटा १७ रुपैयाँ हुन आउँछ । किसानले हाल प्रतिगोटा १५ रुपैयाँ मात्र पाउने गरेको बताइन्छ । सामान्यतया एउटा कुखुराका लागि औषधि, खोप र अन्य उपचारमा १ सय ६५ रुपैयाँ खर्च हुने किसानको भनाइ छ ।