22 May 2024  |   बिहिबार, जेष्ठ १०, २०८१

भूकम्पको पूर्ण क्षति विवरण पठाउन निर्देशन

मिसनटुडे संवाददाता
प्रकाशित मितिः बुधबार, मंसिर ६, २०८०  

सुर्खेत ।

जिल्ला विपद् व्यवस्थापन समिति जाजरकोटको बैठकले भूकम्पबाट क्षति भएका भौतिक संरचनाको पूर्ण विवरण भोलि बिहीबारसम्म पठाउन पालिकाहरूलाई निर्देशन दिएको छ ।

बैठकमा ऊर्जा, जलस्रोत तथा सिँचाइमन्त्री शक्तिबहादुर बस्नेत, कर्णाली प्रदेशका आर्थिक मामिला तथा योजनामन्त्री वेदराज सिंहलगायत सहभागी थिए ।

बस्न मिल्ने र नमिल्ने घरको वर्गीकरण गरेर स्थानीय तहको विपद् व्यवस्थापन समितिबाट निर्णय गराई जिल्लास्थित प्रमुख जिल्ला अधिकारीको संयोजकत्वको विपद् व्यवस्थापन समितिलाई सिफारिस गर्न बैठकले निर्देश गरेको हो ।

अहिले पठाएको विवरण स्पष्ट नभएको जनाउँदै बैठकले पूर्ण विवरण पठाउन स्थानीय तहलाई आग्रह गरेको हो । यसैगरी सरकारी कार्यालयको क्षतिको विषयमा सरकारी कार्यालयलाई नै विवरण पठाउन आग्रह गरिएको छ ।

अस्थायी टहरा निर्माण गरी विद्यालय सञ्चालन गरिएको छ । बस्न नमिल्ने घरका लागि मात्र अस्थायी आवास निर्माण गर्न रकम दिइनेछ । त्यस्तै मंसिरभित्र खाद्यान्न जम्मा गर्न र प्रभावित क्षेत्रमा तुरुन्तै मेडिकल टिम परिचालन गर्नसमेत आग्रह गरिएको छ ।

प्रकाशित मितिः बुधबार, मंसिर ६, २०८०     7:11:46 AM  |