राज्यमन्त्री विमला प्रकरणः प्रदेश सरकारले थाल्यो छानबिन



दाङ ।

लुम्बिनी प्रदेशकी स्वास्थ्य राज्यमन्त्री विमला ओलीले दाङस्थित तुलसीपुरकी एक महिला र नाबालिकामाथि कुटपिट गरेको आरोप लागेको घटनाका विषयमा छानबिन सुरु भएको छ ।

प्रदेश सरकारले बनाएको छानबिन समितिले बुधबारदेखि छानबिन सुरु गरेको हो । उक्त घटनाका विषयमा गहिरो अध्ययन गरेर समितिले १५ दिनभित्र प्रदेश सरकारलाई प्रतिवेदन बुझाउने छ ।

‘घटनाबारे अनसन्धान सुरु भएकाले अझै कति दिन लाग्छ ? भनेर यकिन गर्न सकिने अवस्था छैन,’ आन्तरिक मामिला तथा सञ्चारमन्त्री तिलकराम शर्माले भने, ‘घटनाको यकिन तथ्य थाहा नहुँदासम्म अनुसन्धान चलिरहने कुरा हुन्छ ।’ उनका अनुसार बुधबार पीडित महिला र उनको परिवारलगायत स्थानीयहरुसँग यो समितिले घटनाबारे सोधपुछ गरेको छ ।

राज्ममन्त्री वलीले तुलसीपुरका एकराज बस्नेतकी श्रीमती मीना भण्डारी बस्नेत र उनकी ६ वर्षीया छोरीलाई गत जेठ ३१ गते घरमै प्रवेश गरेर कुटपिट गरेको आरोप लागेको छ ।

घटना लगत्तै राज्यमन्त्री ओलीलाई ईलाका प्रहरी कार्यालय तुलसीपुरले नियन्त्रणमा लिएको थियो । घटनाबारे अनुसन्धानका लागि उसैदिन जिल्ला प्रहरी कार्यालयमा ल्याइएकी राज्यमन्त्री ओलीलाई राति बुटवल पु¥याइएको थियो ।

आन्तरिक मामिला तथा सञ्चारमन्त्री शर्माको संयोजकत्वमा रहेको छानबिन समितिले घटनास्थलमै आएरै वास्तविकता बारे अनुसन्धान गरिरहेको जनाएको छ ।

संयोजक सञ्चारमन्त्री शर्मासहित समितिका सदस्यहरु अहिले तुलसीपुरमै आएर घटनाबारे अनुसन्धान गरिरहेका छन् । यो समितिमा कानुन, महिला बालबालिका तथा ज्येष्ठ नागरिकमन्त्री रमा घर्ती र मुख्य न्यायाधीवक्ता श्रीकृष्ण सुवेदी सदस्य छन् ।

  • No tags available
प्रकाशित मिति : २०७९ असार ९ गते बिहीबार