8 December 2021  |   बिहिबार, मंसिर २३, २०७८

अक्सिजन उद्योगको सुरक्षामा प्रहरी

मिसनटुडे संवाददाता
प्रकाशित मितिः बुधबार, बैशाख २२, २०७८  

कोहलपुर ।

देशभरका अक्सिजन उद्योगको सुरक्षा नेपाल प्रहरीले गर्ने भएको छ । उद्योग, वाणिज्य तथा आपूर्ति मन्त्रालयले अक्सिजन उद्योगको सुरक्षाका लागि आग्रह गरेपछि गृह मन्त्रालयले प्रहरी खटाउने निर्णय गरेको हो ।

अक्सिजन उद्योग भएको जिल्लाका प्रमुख जिल्ला अधिकारीलाई उद्योगले मागे बमोजिमको सुरक्षाकर्मी उपलब्ध गराउन परिपत्र गरिएको गृह मन्त्रालयका सूचना अधिकारी खुमकान्त आचार्यले जानकारी दिए । उद्योग मन्त्रालयले सुरक्षा माग गरेको हुनाले प्रहरी खटाउने निर्णय भएको र सोहीअनुसार परिपत्र गरेको आचार्यले बताए । ‘हामीले सबै जिल्ला प्रशासनलाई परिपत्र गरिसकेका छौं ।

अब अक्सिजन उद्योग भएका जिल्ला प्रशासनले उद्योगले मागे बमोजिमको संख्यामा सुरक्षाकर्मी त्यहाँ खटाउनु हुन्छ,’ सूचना अधिकारी आचार्यले भने । कोरोना संक्रमितको संख्या बढेसँगै देशभर अक्सिजनको माग पनि बढेको छ । यसका कारण अक्सिजन उद्योगमा असुरक्षा बढेको भन्दै उद्योगहरुले सरकारसँग सुरक्षा माग गरेका थिए । गृह मन्त्रालयको निर्णयपछि अक्सिजन उद्योगहरुमा प्रहरी पुग्ने क्रममा रहेको उद्योग विभागले जनाएको छ ।

अक्सिजनको माग बढेका कारण उद्योगको असुरक्षा बढेको तथा वितरण प्रणालीमा उद्योगलाई नटेर्ने प्रवृत्ति बढेपछि त्यसलाई समन्वय गर्न पनि प्रहरीले परिचालन गर्नुपरेको महानिर्देशक जीवलाल भुसालले जानकारी दिए । ‘देशैभरका उद्योगमा प्रहरीले सुरक्षा दिने निश्चित भएको छ, केही उद्योगमा प्रहरी पुगिसकेको र केहीमा पुग्ने क्रममा रहेको जानकारी पाएको छु,’ उनले भने । उद्योगको सुरक्षामा खटिने प्रहरीले वितरणलाई प्रभावकारी बनाउने, उद्योगका कार्मचारीको मनोबल बढाउने तथा समग्र उद्योगको सुरक्षा हेर्नेछन् ।

नेपाल अक्सिजन उत्पादक संघका महासचिव नारायणदत्त तिमिल्सनाले अहिलेकै अवस्था रहिरहे अक्सिजन खोस्ने अवस्था आउने देखिएपछि उद्योग मन्त्रालयसँग सुरक्षाको प्रबन्ध गर्न माग गरेको बताए । हाल देशभर २० वटा अक्सिजन उद्योगहरु सञ्चालनमा रहेका छन् । बाँकेमा दुई वटा अक्सिजन उद्योगहरु रहेको जिल्ला प्रशासन कार्यालय बाँकेले जनाएको छ । गृह मन्त्रालयको परिपत्रअनुसार दुवै उद्योगमा आवश्यकताअनुसार नेपाल प्रहरी खटाइने प्रशासनले बताएको छ ।

प्रकाशित मितिः बुधबार, बैशाख २२, २०७८     9:24:06 AM  |