कोहलपुर ।
सोमबार दिउँसो आगलागी हुँदा बाँकेको राप्तीसोनारी गाउँपालिका वडा नम्बर ८ मा ढकेरीमा ३ घर जलेका छन् । ढकेरीको नयाँगाउँमा भएको आगलागीका कारण ३ वटा घर जलेको ईलाका प्रहरी कार्यालय कोहलपुरले जनाएको छ ।
कोहलपुर प्रहरीका अनुसार सोमबार दिउँसो करिब ३ बजेतिर घरहरुमा आगलागी भएको थियो । आगलागीबाट स्थानीय रंगीलाल थारू, नन्दु चौधरी र राजकुमार थारूको भान्साघर जलेर नष्ट भएको ढकेरी प्रहरी बिटले जनाएको छ । ढकेरी प्रहरी बिटका इन्चार्ज प्रहरी सहायक निरीक्षक कुल बहादुर बमले आगलागीबाट खाद्यान्न, लत्ताकपडा, भाँडाकुडा र घरमा राखिएको काठ जलेर नष्ट भएको जानकारी दिए ।
बस्ती नजिकै रहेको वनस्पति उद्यान (ढकेरी पार्क)मा लागेको आगो घरमा सल्किएर आगलागी भएको प्रहरीले जानकारी दिएको छ । प्रहरी, स्थानीय र कोहलपुर नगरपालिकाको दमकलको सहायताले एक घण्टापछि आगलागी नियन्त्रण लिइएको थियो । आगलागी पीडितहरुलाई तत्काल राहतको व्यवस्था गरिने राप्तीसोनारी गाउँपालिकाले जनाएको छ । जंगलमा आगलागी भइरहेको बताउँदै कोहलपुर प्रहरीले त्यो आगो घरसम्म आइपुगेर धनजनको क्षती हुनसक्ने भएकाले सतर्कता अपनाउन सबैलाई आग्रह गरेको छ ।