शुक्रबार साँझ दुर्घटनास्थलबाट उद्दार गरेर ल्याइएपछि कोहलपुर मेडिकल कलेजको बेडमा आमा गुमाएकी बालिका ।
कोहलपुर ।
पाँच जनाको ज्यान जाने गरी कोहलपुर नगरपालिका १३ बाँके राष्ट्रिय निकुन्ज सडक खण्डको रोहणी खोला भएको सवारी दुर्घटनामा डेढ वर्षीया बालिका सकुशल बाँच्न सफल भएकी छन् ।
आमाको भने दुर्घटनामा मृत्यु भएको ईलाका प्रहरी कार्यालय कोहलपुरले जनाएको । सिराहा सुखीपुर गाउँपालिका–३ घर भएकी ३२ बर्षीया अम्बिका कान्तिको दुर्घटनामा मृत्यु भएको हो । उनीसंगै डेढ वर्षीया छोरी पनि थिइन् ।
छोरी सुरक्षित रुपमा कोहलपुर मेडिकल कलेजमा रहेको कोहलपुरका डिएसपी रविन्द्र खनालले जानकारी दिए । कान्ति शिक्षाका लागि खाद्यान्न कार्यक्रम सुर्खेतमा कार्यरत थिईन । उनी घर जाँदै थिइन् ।
त्यस्तै दुर्घटनामा ज्यान गुमाएकाहरुको सनाखत भएको छ ।
कोहलपुर इलाका प्रहरी कार्यालयका डिएसपी रविन्द्र खनालका अनुसार मृत्यु हुनेमा बांके कोहलपुर नगरपालिका १२ बस्ने २१ वर्षीय उदय बाठा, कोहलपुर १३ का २५ वर्षीय खगेन्द्रबहादुर सुनार, सुर्खेत सापाखानी ७ का ४१ वर्षीय जीवनकुमार विक र झापा मेची नगरपालिका १० का ४५ छत्रबहादुर कटवालकोसहित एक महिला छन् ।
सुर्खेतबाट धरान जाँदै गरेको मे १ ख ३३४७ नम्बरको बस र विपरीत दिशाबाट आइरहेको टिपर शुक्रबार साँझ ठोक्किँदा पाँच जनाको मृत्यु भएको थियो । प्रहरीका अनुसार दुर्घटनामा ३७ जना घाइते भएका छन् । घाइतेहरुमध्ये सात जनाको अवस्था गम्भीर छ ।