मिसनटुडे संवाददाता
प्रकाशित मितिः आइतवार, चैत्र ८, २०७७
कोहलपुर ।
सवारी दुर्घटनामा परेर बाँके राष्ट्रिय निकुञ्जका एक कर्मचारीको मृत्यु भएको छ ।
शनिवार राती बाँके राप्तीसोनारी गाउँपालिका, ८ शम्शेरगञ्ज नजिकै रोकिराखेको ट्रकमा मोटरसाइकल ठोक्किदा निकुञ्जका कर्मचारी २६ वर्षीय नबराज बुढाथोकी मृत्यु भएको हो ।
जिल्ला ट्राफिक कार्यालय बाँकेका अनुसार पूर्वबाट पश्चिमतर्फ आउँदै गरेको भे १० प ९५४९ नम्बरको मोटरसाइकल बिग्रीएर रोकिराखेको ना ७ ख ६४०१ नम्बरमा ठोक्किएको थियो ।
पश्चिम रुकुमको सानिभेरी गाउँपालिका, ११ घर भएका बुढाथोकी निकुञ्जका गेम स्काउट रहेका थिए । ट्राफिक प्रहरीका अनुसार सवारी दुर्घटना शनिवार राती सवा ११ बजेको समयमा भएको थियो ।
मृतक बुढाथोकी सानिभेरी गाउँपालिका, ११ का अध्यक्ष तुल्सिराम बुढाथोकीका जेठा छोरा हुन् ।