शुभाकर विश्वकर्मा, कोहलपुर
कोहलपुर उद्योग वाणिज्य संघको आगामी कार्यकालका लागि अध्यक्ष पदका उम्मेदवारहरुले मतदाताहरुलाई दर्जन भन्दा बढी आस्वासनका पोका बाँडेका छन् । आगामी कार्यकालका निर्वाचन आउन दुई दिन अघि दुवै जना उम्मेदवारले आफ्नो पक्षमा मतदाता आकर्षित गर्नको लागि आस्वासनै आस्वासन बाँडेका हुन् । पर्सी हुने निर्वाचनमा आगामी कार्यकालका लागि साझा समावेशी व्यवसायी प्यानल र लोकतान्त्रिक समावेशी व्यवसायी समूह चुनावी मैदानमा छन् । केन्द्रमा राजनीतिक रुपमा विभाजित सत्ताधारी नेकपा समर्थित साझा प्यालनको कमाण्डर विष्णु खनाल छन् । यस्तै प्रमुख प्रतिपक्ष दल नेपाली काँग्रेस निकट लोकतान्त्रिक समूहका व्यावसायीहरुको नेतृत्व लक्ष्मणराज पौडेलले सम्हालिरहेका हुन्।
बुधबार कोहलपुर जेसीजले आयोजना गरेको ‘कोहलपुर उद्योग वाणिज्य संघको अध्यक्षका उम्मेदवारसँग ककस कार्यक्रम’मा खनाल र पौडेलले एउटै प्रकारका दर्जनौ आस्वासनहरुको घोषण गरेका हुन् । उक्त कार्यक्रममा खनाल र पौडेल मुख्य वक्ताका रुपमा थिए । उनीहरुलाई कसले अगाडि बोल्ने भन्ने बारेमा गोला प्रथा गरिएको थियो । अगाडि बोल्ने पालो खनालको प¥यो । जेसीजद्धारा आयोजित ककस कार्यक्रम, गोला प्रथा र बोल्दा अर्को उम्मेदवारको कुरा काट्न नपाउने अन्र्तराष्ट्रिय अभ्यास हो । जहाँ उम्मेदवारले निश्चित समयावधिभित्र आफ्ना कुरा पात्र राख्न पाउँछ ।
उक्त अवसरमा बोल्दै साझा समावेशी व्यवसायी प्यानलका अध्यक्ष उम्मेदवार विष्णु खनालले आफूले निर्वाचन जितेको भोलीपल्टबाट काम थालनी गर्ने बताए । उनले आफू कोहलपुर उद्योग वाणिज्य संघको अध्यक्ष पदमा निर्वाचित भएमा सबैभन्दा पहिला कोहलपुरको न्युरोडदेखि दशविगाहसम्मको ग्रीन बेल्डसम्म पानी र बस्ने ठाउँको व्यवस्था गर्ने र रेलिङ हाल्ने घोषणा गरे । उनका अनुसार न्युरोड क्षेत्रमा कोहलपुर उद्योग वाणिज्य संघले ‘वाणिज्य पार्क’ निर्माण गरिनेछ । कोहलपुर क्षेत्रका उद्योगी र व्यवसायीहरुका मुद्दा आफ्ना प्रमुख प्राथमिकता हुने उनको भनाइ थियो ।
‘कोहलपुरमा समस्याका रुपमा रहेको घरबेटी र घरभाडामा बस्नेहरुको समस्या समाधानको लागि स्पष्ट कानुन बनाएर बैधानिक नीति निर्माण गरिनेछ ।व्यवसायीहरुलाई करको दायरामा ल्याउने, क्षमता विकास,तालिम प्रदान गर्नेछु । व्यापारीहरुको हक र हित तथा अधिकारको सुनिश्तिताको व्यवसायीहरुको एकतालाई जोड दिएको छु ।’ खनालले भने ।
अध्यक्षका उम्मेदवार खनालका अनुसार उद्योग वाणिज्य संघको निर्माणधिन भवन निर्माण कार्य सम्पन्न गरिनेछ । उद्योग वाणिज्य संघले निर्माण गरेको हाटबजार व्यवस्थित गर्ने र सरकारी स्वामित्वमा रहेको कृषि हाट बजारलाई पनि स्तरोन्नती गर्न नगरपालिकासँग सहकार्य गर्ने आस्वासन थियो । उनले उद्योग वाणिज्य संघलाई वस्तुगत व्यवसायीहरुको पनि साझा थलो बनाउने र छुट्टै संरचना निर्माण गरिने आस्वासन दिए ।
उनले अघि भने,‘अहिलेसम्म हार र जित स्वीकार गर्दै आएको छु । २४ वर्षसम्म व्यवसायीहरुकै हितका लागि संघर्ष गरे ।एकपटकको लागि मेरो प्यानललाई जिताउनुहोस । म उद्योग वाणिज्य संघले गर्ने काम के हो । तीन वर्षमा देखाइदिनेछु ।’ लुम्बिनी प्रदेश सहित अन्य प्रदेशका उद्योग वाणिज्य संघहरुलाई कोहलपुरले गरेका काम हेर्न आउने बनाउने छु । यस्तै उनले आफ्नो लागि अहिलेको उम्मेदवारी अन्तिमपटक भएको समेत बताए ।
यसैगरी लोकतान्त्रिक समावेशी व्यवसायी समूहका अध्यक्षका उम्मेदवार लक्ष्मण राज पौडेलले पनि खनालले दिएका केही आस्वासन दोहो¥याए । कृषि हाट बजारलाई व्यवस्थित बनाउने, उद्योग वाणिज्य संघको भवन निर्माण कार्य सम्पन्न गर्ने, व्यवसायीहरुका समस्या समाधानको लागि सक्रिय पनि उनले प्रतिबद्धता व्यक्त गरे । ‘यहाँहरुले मलाई माया होइन विस्तास गर्नुहोस् । आशा होइन ढुक्क हुुनुहोस् ।आशाले मान्छेलाई सफलता दिदैन ।तपाई ढुक्क हुनुपर्छ हरेक कुरामा । यो युवा हुँ म । जसमा जोश, जाँगर र होस पनि छ । यसकारण जिताउनुहोस हाम्रो प्यानललाई ।’
उनका अनुसार उद्योग वाणिज्य संघ सरकार होइन, संस्था हो । आफूले उद्योग वाणिज्य संघ छायामा परेको हुँदा आफूले क्रियाशिल बनाउने पनि उनको प्रतिबद्धता रहेको छ । यस्तै टाउन प्लानिङ क्षेत्रमा व्यवस्थित पार्किङ, कोहलपुरलाई व्यवसाय मैत्री सहरका रुपमा विकास गर्ने, चोरी नियन्त्रणको लागि आफ्नो पहल हुने पौडेलको भनाइ छ । उनले अघि भने,‘सडक क्षेत्र व्यवस्थित बनाइनेछ । दुर्घटना न्युनिकरणका लागि अब डिभाइडर होइन आकाशे पुल आवश्यक छ । कोहलपुरमा आकाशे पुल बनाउनुपर्छ । बन्दै गरेको नौवस्ता औद्योगिक क्षेत्रलाई व्यवस्थित बनाउनु पर्ने र छिटो सम्पन्न गर्नुपर्छ । कोहलपुर नगरपालिकाभित्र मिनी उद्योग क्षेत्र बनाउनुपर्छ ।’ उक्त अवसरमा अध्यक्षका उम्मेदवार र व्यवसायीहरु बीच प्रश्नोत्तर कार्यक्रम समेत भएको थियो ।