पोखरा। गण्डकी प्रदेशका भूमि व्यवस्था, कृषि तथा सहकारीमन्त्री लेखबहादुर थापामगरले नेपाली जनताको ठूलो बलिदानीबाट प्राप्त संविधान कार्यान्वयनसँगै मुलुकले समृद्धि प्राप्त गर्ने बताउनुभएको छ ।
संविधान दिवसको अवसरमा आज पोखरा महानगरपालिका–१७ सीतापाइलास्थित पोखरा वृद्धाश्रममा आश्रित ज्येष्ठ नागरिकलाई फलफूल वितरण कार्यक्रममा बोल्दै उहाँले संविधानले सबैको हक र अधिकारलाई सुचिश्चित गरेको बताउनुभयो ।
मानव सेवा जस्तो धर्म अरु कुनै पनि नभएको उल्लेख गर्दै उहाँले समाजका असहाय ज्येष्ठ नागरिक, विपन्न वर्गका बालबालिकाको क्षेत्रमा संलग्न विभिन्न सङ्घसंस्थाका लागि प्रदेश सरकारको सहयोग रहने जानकारी दिनुभयो ।
पोखरा वृद्धाश्रमका अध्यक्ष वसन्त केशव पराजुलीले आश्रममा विभिन्न जिल्ला र समुदायबाट आएका कठिन परिस्थितिका ६५ वृद्धवृद्धा र १० सेवकसेविका आवद्ध रहेको जानकारी दिनुभयो । आमाबुबालाई मायाममता दिएर घरमै राख्ने र सहारा कोही पनि नभएका ज्येष्ठ नागरिकलाई मात्र वृद्धाश्रममा ल्याउनुपर्ने संस्कारको विकास आवश्यक रहेको उल्लेख गर्दै उहाँले मानव परोपकारी संस्थालाई सरकारीस्तरबाट सहयोग गर्नुपर्नेमा जोड दिनुभयो ।
मन्त्रालयका सचिव अच्युतप्रसाद ढकालको अध्यक्षतामा भएको कार्यक्रममा वृद्धाश्रमका उपाध्यक्ष कुसुमकेशव पराजुली, मन्त्रालयका उपसचिव बद्रीनाथ अधिकारीलगायतले वृद्धाश्रमले राज्यको दायित्वभन्दा माथि उठेर समाजका विपन्न एवं असहाय ज्येष्ठ नागरिकको सेवामा समर्पित रहेको बताउनुभयो ।
प्रदेश सरकारले संविधान दिवसको तीनदिने कार्यक्रमअन्तर्गत आज अन्तिम दिन पोखरा र आसपासका विभिन्न छ सङ्घसंस्थामा फलफूल तथा आवश्यक भौतिक सामग्री वितरण गरेको थियो । -रासस