बाँसगढी, बर्दिया ।
सामुदायिक विद्यालय प्रति आम नागरिकको विश्वास दिलाउन बाँसगढी नगरपालिकाले रचनात्मक कामको थालनी गरेको छ । संविधान दिवसको खुसीयाली मनाउदै गर्दा शुक्रबार नगरपालिकाले सामुदायिक विद्यालय प्रति सम्मान, ईज्जत र विश्वास बढाउन योगदान पु¥याउने जनप्रतिनिधि, शिक्षक, कर्मचारी, विद्यालय र विद्यार्थीलाई सम्मान र पुरुस्कृत गरेर रचनात्मक कामको थालनी गरेको हो । नगरपालिकाले गरेको यो कार्यले सामुदायिक विद्यालय प्रति आम नागरिकहरुको विश्वास बढेको र संविधान दिवस मनाउनुको सार्थकता पनि थपेको आभास गरिएको छ ।
नेपाल सरकारको नितिलाई सहयोग गर्दै आफ्ना छोराछोरी सामुदायिक विद्यालयमा पढाउँदै आएका जनप्रतिनिधी, शिक्षक र कर्मचारीहरु गरी ९२ जनालाई सम्मान पत्र सहित दोसल्ला ओढाएर सम्मान गरिएको थियो । दिवसको अवसरमा भएको भव्य समारोहका बिच सरकारी विद्यालयमा छोरा छोरी पढाउने ७ जना जनप्रतिनिधी, ४० जना शिक्षक र ४५ जना कर्मचारी गरी ९२ जनालाई सम्मान गरिएको नगर शिक्षा शाखा बाँसगढीका प्रमुख मन प्रसाद रेग्मीले जानकारी दिए ।
त्यसैगरी नगरपालिकाले माध्यामिक शिक्षा परीक्षा (एसईई)मा उत्कृष्ट जिपिए ल्याउने नेरा मावि बाँसगढीका सर्विना तिमिल्सेना, पुर्णहिरा मावि लक्ष्मणाका प्रशान्त पाण्डे, त्रिभुवन मावि ककौराका विपिन राना र संस्थागत विद्यालय बालज्योति एकेडेमी ककौराका बिमल कुमार थारुलाई प्रोत्साह स्वरुप १० हजार छात्रबृति सहित प्रमाण पत्र दिएर सम्मान गरेको थियो ।
नगर स्तरिय आधारभुत शिक्षा उत्तीर्ण परीक्षा २०७५ मा उत्कृष्ट जिपिए ल्याउने पुर्णहिरा मावि लक्ष्मणाका प्रेरणा देवकोटा, नेरा मावि बाँसगढीकी गंगा कुमारी वली र शिव आधारभुत विद्यालय उत्तरभकारीका दुर्गा विकलाई ५ हजार छात्रबृति सहित सम्मानपत्र दिएर सम्मान गरियो । दिवसको अवसरमा शैक्षिक सत्र २०७६ मा अत्यधिक विद्यार्थी भर्ना गर्ने नेरा मावि बाँसगढी, विश्वजोति आधारभुत विद्यालय राजिपुर र मुक्तकमैया विकास प्रावि शान्तीनगरलाई नगद १ लाख र सम्मान पत्रका साथ सम्मान गरिएको छ ।
त्यस्तै माध्यामिक शिक्षा परीक्षा(एसईई)मा उत्कृष्ट जिपिए ल्याउने विद्यालय पुर्णहिरा मावि लक्ष्मणा, रामजानकी मावि र संस्थागत विद्यालय तर्फ बालज्योति एकेडेमी ककौरालाई नगद १ लाख सहित सम्मान पत्रले सम्मान गरिएको थियो भने शैक्षिक सत्र २०७६ मा प्राथमिक विद्यालय तर्फ अत्यधिक विद्यार्थी भर्ना गर्न सफल जनकल्याण प्रावि मगरपुरलाई १ लाख नगद सहित सम्मान पत्रले सम्मान तथा पुरुस्कृत गरिएको थियो । नगरपालिकाले बाँसगढी क्षेत्रका विभिन्न वडाका उत्कृष्ट काम गर्ने उपभोक्ता समितिलाई समेत सम्मान गरेको छ ।
नगरपालिका भित्रका ९ वडाका तीन तीन वटा उपभोक्ता समितिलाई सम्मान पत्र र दोसल्ला ओढाएर सम्मान गरिएको थियो । संविधान दिवसकै अवसरमा नगरपालिकाले बर्ष भरी उत्कृष्ट काम गर्ने बाँसगढी नगरपालिकाका नायव ऋषिराम शर्मालाई उत्कृष्ट कर्मचारीको रुपमा सम्मान गरेको छ । नगर प्रमुख सालिकराम अधिकारीले सबैलाई सामुदायिक विद्यालय प्रति अपनत्व, प्रेरणा, उत्साहित र जिम्मेवारी बोध गराउन सन्देश दिने कार्यको सुरुवात गरिएको बताए ।
‘सामुदायिक विद्यालयप्रति केही भएपनी अभिभावकहरुको आकर्षण बढाउनको लागि यस्तो कार्यक्रम गरेका हौं’ उनले भने, ‘आगामी दिनमा नगरपालिकाले सामुदायिक विद्यालयमा आकर्षण बढाउनको लागि गुणस्तरमा समेत ध्यान दिनेछ ।’