नेपालगन्ज/ नेपालगन्ज उपमहानगरपालिकाको सुर्खेत रोडस्थित ग्रीन बेल्टमा वृक्षारोपण गरिएको छ । अक्सफामको सहयोग तथा बी ग्रुपको सहकार्यमा उपमहानगरपालिकाले मंगलबार सर्खेत रोडस्थित महेन्द्र बहुमुखी क्याम्पस क्षेत्रमा ४० वटा विरुवा रोपेको हो ।
नेपालगञ्ज उद्योग वाणिज्य संघ र महेन्द्र बहुमुखी क्याम्पसको संरक्षण रहने गरि ट्री गार्डसहितका उन्नत जातका शमीका विरुवा रोपिएको हो । उपमहानगरपालिका उपप्रमुख उमा थापामगरले शमीको विरुवा रोपेर वृक्षारोपण शुभारम्भ रेकी थिइन् ।
उपप्रमुख थापामगरले विरुवाको नियमित संरक्षण गरेर हुर्काउन आह्वान गर्दै सामुहिक हातेमालोमा नगर हराभरा बनाइने अभियान शुरु भइसकेको उदघोष गरिन् ।
कार्यक्रममा महेन्द्र बहुमुखी क्याम्पसका प्रमुख गणेश कुमार रेग्मी, बी ग्रुपका अध्यक्ष राजकुमार क्षेत्री, उद्योग वाणिज्य संघका अध्यक्ष नन्दलाल वैश्य लगायतले वृक्षारोपणसँगै यसको सम्वद्र्धनतर्फ जोड दिएका थिए । यस्तै जील्ला वन कार्यालय अगाडि पनि वृक्षारोपण गरिएको छ ।