कोहलपुर,२२ जेठ/ बाँकेको खजुरास्थित डीगाउँमा टुबोर्ग तेस्रो नेपालगञ्ज गोल्डकप फुटबल प्रतियोगिता शुरु भएको छ ।
सोमबार नेपाल राष्ट्रिय आदर्श निमाविको मैदानमा भएको गोल्डकपको उद्घाटन खेलमा आयोजक नेपालगञ्ज–११ विजयी भएको छ । जितसँगै नेपालगञ्ज–११ सेमिफाइनलमा पुगेको छ । नेपालगञ्ज–११ ले सशस्त्र प्रहरीलाई २–० गोलले पराजित गरेको हो ।
खेल शुरु भएको ४ मिनेटमै दायाँ छेउबाट विदेशी खेलाडी मुस्तफाले निकालेको क्रसलाई विक्रमसिंह ठकुरीले गोलमा परिणत गरेका थिए । मध्यान्तरसम्म अर्को गोल हुन सकेन ।
दुवैतर्फबाट खेलाडीले केही राम्रा अवसर खेर फालेका थिए । मध्यान्तरपछि फेरि ४ मिनेटमै आयोजक टीमका विमल रानाले अर्को गोल थप्दै आफ्नो टिमलाई जित दिलाएका थिए ।
प्रतियोगिताको म्यान अफ म्याच नेपालगञ्ज–११ का विक्रमसिंह ठकुरी घाषित भएका थिए । उनले एउटा मोबाइल पाए । प्रतियोगितामा ६ वटा टीमको सहभागिता रहेको छ । मंगलबार सुदूरपश्चिम–११ र सरस्वती क्लवका बीचमा खेल हुनेछ ।
प्रतिक्रिया दिनुहोस्