21 January 2022  |   शुक्रबार, माघ ७, २०७८

प्रथम श्रेणीमा स्नातक गरेकी सारदा गाईपालनमा

मिसनटुडे संवाददाता
प्रकाशित मितिः बिहिबार, साउन २०, २०७३  

केशव राना
कोहलपुर, २० साउन
कोहलपुर १२ चप्परगौडीकी सारदा शर्मा (३०) ले ११ वर्षको उमेरमा नै दुध दुहुन सिकिन् । भारतमा बस्दा नै उनका बुवाले गाईपालन गर्थे । सानै उमेरमा बुवाले नै उनलाई दुध दुहुन सिकाए ।
‘११ वर्षको उमेरमा नै मैले दुध दहुन सिकेँ’ उत्कृष्ट गाइपालन कृषक सारदा भन्छिन्् ‘नेपालमा आएर व्यवसायीक गाईपालन गर्न थाल्यौं ।’ बिहानै ५ बजे उठ्ने गोबर सोहोर्ने, दुध दुहुने र गाईलाई दाना खुवाउने गर्छिन् उनी । उनको यो दैनिकी विगत १३ वर्षदेखिको हो । जब उनी १५ वर्षकी भइन् व्यवसायीक रुपमा गाईपालन शुरु गरिन् । आमाबुवाको साथमा उनले सारदा श्रृजनशिल गाई फर्म स्थापना गरिन् । शुरुका दिनमा १५ हजारको एउटा गाईबाट गाईपालन शुरु गरेकी उनले अहिले उन्नत जातका हलस्टेन र जर्सी प्रजातीका १४ वटा गाईगोरु पालिरहेकी छन् । अहिले ४ वटा दुहुनो गाई छन् भने २ वटा ब्याउने अवस्थामा छन् । दुध बेचेर उनले खर्च कटाई वार्षिक साढे ५ लाख रुपैंया आम्दानी गर्ने गरेको बताउँछिन् । दुध र साथै गोरुहरु बेचेरै उनले जग्गा, घर जोडन् सफल भएकी छन् । साथै आफू र आफ्नो भाइको पढाई खर्च पनि यसैबाट चल्ने गरेको उनले बताइन् । उनी आफैमा स्नातक उत्तीर्ण हुन् । उनले मानवीकी संकाय अन्तरगत सामाजिक विषयमा प्रथम श्रेणीमा स्नातक उत्तिर्ण गरेकी हुन् ।

IMG_0159

साथै समाजसेवा पनि गर्ने गरेकी छन् । उनी नेपाल चिल्ड्रेन एजुकेशन प्रोग्राम बाँकेको अध्यक्ष समेत हुन् ।  ‘कृषिमा राम्रो सम्भावना देखेरै कृषि पेशा रोजेको हुँ’ उनले भनिन् ‘समाजले पनि राम्रै नजरले हेरेको छ ।’ उनलाई बाबुआमा, भाइ, बुहारीले सघाउने गरेका छन् । यस क्षेत्रकै उत्कृष्ट कृषकको रुपमा चिनिने उनले विभिन्न सरकारी, गैरसरकारी संघसंस्थाबाट पनि सहयोग पाउने गरेकी छन् । गोठ सुधार, घाँसका बिउ लगायतका सहयोग पाउने गरेको उनले बताइन् । साथै उत्कृष्ट कृषक भएकाले डेरीबाट पनि सम्मानित भएको उनी सम्झिन्छिन् । गाईपालनमा स्याहार, थुनाईलो रोग, किर्ना पर्ने लगायतमा समस्या भएपनि आफूले सामान्य किसिमका रोगहरुको घरमै उपचार गर्ने विधि सिकेकाले खासै समस्या नभएको बताइन् । स्वदेशमै कृषि गरेर आयआर्जन गर्न सकिने बताउँदै उनले विदेश जानुभन्दा स्वदेशमै कृषि गरी आयआर्जनलाई बढाउन युवाहरुलाई सुझाव दिएकी  छन् ।

प्रकाशित मितिः बिहिबार, साउन २०, २०७३     10:59:58 AM  |