‘रात्रिकालीन जीप सफारी’ ले सामुदायिक वनका उपभोक्तामा उत्साह

चितवन ।

वरण्डाभार जैविकमार्गस्थित सामुदायिक वनमा ‘रात्रिकालीन जीप सफारी’ सञ्चालनमा आएपछि स्थानीयमा उत्साह थपिएको छ। पर्यापर्यटनलाई सामुदायिक वनसम्म विस्तार गर्ने लक्ष्यसहित ‘रात्रिकालीन जीप सफारी’ सञ्चालन गरिएको हो। पर्यटनमा नयाँ आकर्षण थप्ने उद्देश्यले परीक्षणका रूपमा ‘रात्रिकालीन जीप सफारी’ सञ्चालन गरिएको पञ्चकन्या सामुदायिक वनका अध्यक्ष गोविन्द स्याङ्तानले बताए।

स्याङ्तानले भने, “यसअघि चितवन राष्ट्रिय निकुञ्जमा सीमित पर्यापर्यटनलाई सामुदायिक वनसम्म विस्तार गर्ने हाम्रो लक्ष्य छ ।” रत्ननगरको दक्षिण क्षेत्रभित्र पर्ने पञ्चकन्या, कालिका नगरपालिकाभित्र पर्ने चर्तुमुखी र भीमवली वनले संयुक्त रूपमा करिब ३० किलोमिटर जङ्गल मार्ग तयार पारी परीक्षणका रूपमा ‘रात्रिकालीन जीप सफारी’ सुरु गरेको बागमती प्रदेश संस्कृति तथा पर्यटन मन्त्रालयका सचिव दीपेन्द्र सुवेदीले जानकारी दिए।

नेपालमा पहिलोपटक चितवनलाई सफारी पर्यटनको राजधानी बनाउने अभियानका साथ ‘रात्रिकालीन जीप सफारी’ सुरू गरिएको सचिव सुवेदीले बताए। उनका अनुसार परीक्षण सफल भएपछि यसलाई नियमित पर्यटन गतिविधिका रूपमा सञ्चालन गरिनेछ।वरण्डाभार क्षेत्र चितवन राष्ट्रिय निकुञ्जलाई महाभारत क्षेत्रसँग जोड्ने महत्वपूर्ण जैविक मार्ग हो । प्रभावकारी संरक्षणले एकसिङ्गे गैँडा, पाटेबाघ, चितुवा, भालु, जरायो, चित्तल, बँदेललगायतका वन्यजन्तु देख्न सकिन्छ ।

रातिको समयमा वन्यजन्तुको प्राकृतिक गतिविधि अवलोकन गर्न सकिने भएकाले ‘रात्रिकालीन जीप सफारी’ पर्यटकका लागि थप आकर्षण बन्ने अपेक्षा गरिएको छ।सामुदायिक वनले संरक्षणसँगै पर्यापर्यटनलाई प्राथमिकतामा राख्दै जङ्गलभित्र रहेका तालतलैयाको मर्मत–सम्भार, वन्यजन्तु अवलोकनका लागि मचान निर्माण तथा पर्यटक मैत्री पूर्वाधार विकासका काम अघि बढाएका छन्।