रोजगारीका लागि भारतको मुम्बई पुगेका बाँकेका दुई जना महिलालाई त्यहाँ बन्धक बनाएर सरोगेसी (आमाको कोख भाडामा लिई बच्चा जन्माउने प्रक्रिया)मा प्रयोग गरियो । बच्चा जन्माइसकेपछि घर पठाइएका ती महिला माइती नेपाल नेपालगन्जको ‘सेल्टर’ मा बसे र परामर्शपछि परिवारमा पुनस्र्थापना भएका छन् ।
कमल डाँगी । नेपालगन्ज ।
रोजगारीको प्रलोभन देखाएर भारतको मुम्बईमा पु¥याइएका नेपाली महिलाहरूलाई सरोगेसी (आमाको कोख भाडामा लिई बच्चा जन्माउने प्रक्रिया)मा प्रयोग गरिएको पाइएको छ । हालै मात्र त्यसबाट पीडित बनेका बाँकेका दुई जना महिला (नाम र ठेगाना गोप्य) माइती नेपाल नेपालगन्जको सम्पर्कमा आएका छन् । उनीहरूलाई बच्चा जन्माइसकेपछि घर पठाइएको थियो ।
घर फर्किएपछि माइती नेपाल पुगेका उनीहरूले आफूहरूमाथि घटेको बर्बर घटनाको वृत्तान्त सुनाएपछि नेपाली महिलालाई भारतमा बन्धक बनाएर भाडाकी आमा बन्न बाध्य पार्ने गरेको रहस्य पत्ता लागेको हो । ती महिला माइती नेपाल नेपालगन्जको ‘सेल्टर’ मा बसे र परामर्शपछि परिवारमा पुनस्र्थापना भएका छन् ।
पीडित महिलाहरू आफन्तको सहारामा रोजगारीका लागि मुम्बई पुगेका थिए । त्यहाँ उनीहरूलाई एउटा फ्ल्याटमा बसाइयो र केही दिनपछि ‘अब तिमीहरूले बच्चा जन्माउने काम गर्नुपर्छ’ भनियो । उनले प्रतिवाद त गरिन तर बन्धक बनाएका कारण त्यहाँबाट उन्मुक्ति पाउन सकिनन् । अन्ततः बच्चा जन्माइसकेपछि मात्रै घर पठाइयो ।
ती महिलाको भनाइ उद्धृत गर्दै माइती नेपाल स्रोतले भन्यो, ‘बच्चा जन्माउन अघिसम्म राम्रैसँग खानेकुरा दिइयो, स्वास्थ्य परीक्षण पनि गरियो तर त्यसपछि भने केही वास्ता गरिएन र घर पठाइयो ।’ घर फर्किएका महिलाका अनुसार, त्यहाँ फ्याट लिएरै महिलालाई बच्चा जन्माउन बाध्य पारिएको छ र त्यहाँ नेपाली महिला धेरै छन् । उनीहरूकै सूचनाका आधारमा माइती नेपालले उद्धार प्रयास गरेको भए पनि त्यहाँ जाँदा फ्ल्याट नै फेरिएको पाइयो ।
यसरी जबर्जस्ती भाडाकी आमा बन्न बाध्य पारिएका महिलाको संख्या अरू पनि भएको सूचना भए पनि सामाजिक अपहेलनामा पर्ने डरले उनीहरू खुल्न चाहिरहेका छैनन् । माइती नेपाल नेपालगन्ज कार्यालयका प्रमुख अधिवक्ता केशव कोइराला भन्छन्, ‘भारतमा जबर्जस्ती भाडाकी आमा बन्न बाध्य पारिएका पीडितहरू सम्पर्कमा आएका छन् । नेपाली महिलालाई सरोगेसीमा प्रयोग गरिएको घटना मानव बेचबिखनको नयाँ रूपमा देखापरेको छ, जुन अत्यन्तै संवेदनशील विषय हो । हामी थप पीडित छन् कि भनेर बुझिरहेका छौं ।’
यस्ता पीडितहरू परिवार र समाजमा अपहेलित हुने त्रासले आफूमाथि घटेको घटनाका बारे कसैलाई बताउन चाह“दैनन्, त्यसैले कति पीडित त न्यायका लागि प्रहरीसम्म पुग्दैनन् । जिल्ला प्रहरी कार्यालय बाँकेका सूचना अधिकारी एवं प्रहरी नायब उपरीक्षक (डिएसपी) नारायण डाँगीका अनुसार, नेपालमा कोख भाडामा लिएर बच्चा जन्माउनु कानुनविपरीत मानिन्छ ।
त्यस्तो कार्य कसैले गरे-गराए कानुनअनुसार कारबाही हुने व्यवस्था भए पनि नेपाली महिलाहरूलाई भारतमा जबर्जस्ती कोख भाडामा लिएर प्रयोग गरिएको विषयमा कुनै उजुरी र जानकारी नआएको डिएसपी डाँगीले बताए । उनले भने, ‘मानव बेचबिखनका उजुरीहरू आएका छन् तर ठ्याक्कै सरोगेसीकै विषय भने आएको छैन ।’
अरूको गर्भ भाडामा लिएर बच्चा जन्माउने प्रक्रियालाई सेरोगेसी भनिन्छ । यो नेपाल र भारतमा कानुनीरूपमा अवैध छ तर लुकिछिपी यस्तो कार्य भइरहेका छन् । अझ नेपाली महिलालाई भारतमा लगेर जबर्जस्ती सरोगेसीमा प्रयोग गरिएको घटना नौलो हो । विगतमा यौन तथा शारीरिक काममा नेपाली महिलालाई प्रयोग गरिएका घटना सार्वजनिक हुने गरेका थिए ।
प्रतिक्रिया दिनुहोस्