17 April 2024  |   बुधबार, बैशाख ५, २०८१

बंशजको नागरिकता प्राप्त गर्न टोकन

मिसनटुडे संवाददाता
प्रकाशित मितिः बुधबार, असार १३, २०८०  

कोहलपुर, जिल्ला प्रशासन कार्यालय बाँकेले जन्मको आधारमा सन्ततीका लागि नयाँ नागरिकता प्राप्त गर्न अनलाइन टोकन प्रणाली लागु गरेको छ । सेवाग्राहीहरुलाई पर्न जाने झन्झटिलो अवस्थालाई सुधार गर्न नागरिकता प्राप्तिका लागि अनलाइन टोकन प्रणाली लागु गरिएको हो ।

सेवाग्राहीले अनलाइनबाट टोकन भरेरै नागरिकता सहजै प्राप्त गर्न सक्ने सहायक प्रमुख जिल्ला अधिकारी टोपेन्द्रबहादुर केसीले जनाए । ‘अनलाइनबाटै टोकन लिँदा कहिले आउने भन्ने कुरा त्यसमा हुनेछ । मिति र गतेअनुसार उहाँहरु आउनु हुनेछ,’ उनले भने, ‘प्रविधिको पहुँचमा हुनेले अनलाइन फार्म भर्नेछन् । पहुँचमा नहुनेहरु भने कार्यालय मै आएर सेवा लिन सक्नेछन् ।’

कार्यालयले जारी गरेको सूचनामा भनिएको छ, ‘नेपाल नागरिकता ऐन (पहिलो संशोधन)ऐन २०७९ को कार्यान्वयनको चरणमा छ । जन्मको आधारमा नागरिकता लिएकाहरुको सन्तानलाई बंशजको आधारमा नेपाली नागरिकता वितरण भइरहेको छ । सो क्रममा सेवाग्राहीहरुलाई कार्यालय मै आएर लाइन लागि पालो कुर्नुपर्ने झन्झटिलो, सास्ती हैरानी हुने अवस्थालाई मध्यनजर गरेर यस्तो सेवा लागु गरिएको छ ।’

नागरिक वितरणलाई सहज, सरल, छिटोछरितो, निष्पक्ष र पारदर्शीरुपले सेवा प्रवाह गर्नका लागि टोकन प्रणाली लागु गरिएको सहायक प्रमुख जिल्ला अधिकारी केसीले बताए । अनलाइन टोकन प्रणालीमा आआफ्नो विवरण प्रविष्ट गर्नुपर्नेछ । टोकनमा तोकिएको दिन मात्रै कार्यालयमा उपस्थित हुनुपर्ने प्रशासनले जनाएको छ ।

ईलाका प्रहरी कार्यालय कोहलपुर र नरैनापुरमा भने प्रणाली लागु हुने छैन । नागरिकता विधेयक प्रणामीकरण भएसँगै बाँकेमा असार १० गतेबाट नागरिकता वितरण सुरु गरिएको थियो । पहिलो दिन एकजनाले मात्रै बंशजको आधारमा नागरिकता लिएको कार्यालयले जनाएको छ । असार ११ गते भने २७ जनाले नागरिकता लिएका थिए ।

 

प्रकाशित मितिः बुधबार, असार १३, २०८०     3:02:51 PM  |