20 May 2024  |   सोमवार, जेष्ठ ७, २०८१

‘प्रेस स्वतन्त्रताको रक्षाका लागि जिम्मेवार बनौं’

मिसनटुडे संवाददाता
प्रकाशित मितिः बिहिबार, बैशाख २१, २०८०  

नेपालगन्ज, प्रेस स्वतन्त्रताको रक्षाका लागि पत्रकार तथा मिडिया सम्बद्धहरु नै जिम्मेवार हुनुपर्नेमा एक कार्यक्रमका सहभागीहरुले जोड दिएका छन् । प्रेस स्वतन्त्रता दिवसको अवसरमा नेपाल पत्रकार महासंघ बाँकेले आयोजना गरेको कार्यक्रममा बोल्ने वक्ताहरुले आम मानिसमा पत्रकारिता र सामाजिक सञ्जालको भेद छ भन्ने जानकारीको अभावले समस्या निम्तिरहेको बताए ।


यसका साथै पत्रकारहरु नै कहिलेकाहिँ आचारसंहिताभन्दा बाहिर गइदिँदा त्यसले आम मानिसमा नकारात्मक धारण विकास हुँदै जानेतर्फ सचेत रहनुपर्नेमा सहभागी पत्रकारहरुको जोड थियो । नेपालमा प्रेस स्वतन्त्रका लागि पटकपटक विभिन्न संघर्ष गर्नुपरेको र ती संघर्षबाट प्रेस स्वतन्त्रताले संवैधानिक मान्यता पाएको बताउँदै सहभागीहरुले अब त्यसको रक्षाका लागि हरदम सचेत रहनुपर्नेमा जोड दिए ।

विभिन्न तहका सरकारले अनेक विधेयक तथा कानुनका नाममा प्रेस स्वतन्त्रता संकूचन गराउने कामहरु गर्ने गरेको बताउँदै राज्यका त्यस्ता कदमहरुविरुद्ध खरोरुपमा प्रस्तुत हुनुपर्नेमा उनीहरुले जोड दिएका थिए ।

प्रेस स्वतन्त्रका लोकतन्त्रको मेरुदण्ड भएकोले यसको संरक्षणको जिम्मेवारी समाजका हरेक सचेत वर्गको भएकोमा सहभागीहरुले जोड दिएका थिए । पत्रकार महासंघ बाँकेका अध्यक्ष दामोदर भण्डारीको अध्यक्षतामा सम्पन्न कार्यक्रममा पत्रकारहरु झलक गैरे, शंकर खनाल, नवीन गिरी, अर्जुन ओली, गोविन्द आचार्य, आरिफ अन्सारीलगायतले आफ्नो धारणा राखेका थिए ।

प्रकाशित मितिः बिहिबार, बैशाख २१, २०८०     11:50:51 AM  |