मिसन संवाददाता,नेपालगन्ज (बाँके)
राप्तीसोनारीमा ‘थारू समुदायको हक अधिकारका लागि नेपाली कांग्रेसको भूमिका’ विषयक अन्तरक्रिया कार्यक्रम सम्पन्न भएको छ । नेपाली कांग्रेस क्षेत्रीय कार्यसमिति क्षेत्र नम्बर १ बाँके थारू समन्वय शाखाको आयोजनामा आइतबार राप्तीसोनारी गाउँपालिका वडा नम्बर ८ शम्शेरगन्जमा थारू समुदायको हक अधिकारको लागि नेपाली कांग्रेसको भूमिका विषयक अन्तरक्रिया कार्यक्रम सम्पन्न भएको हो ।
बाँके क्षेत्र नम्बर १ का पार्टीका थारू नेता तथा कार्यकर्ताहरूको उत्साहजनक उपस्थिति रहेको अन्तरक्रिया कार्यक्रमको पार्टीका सहमहामन्त्री किशोरसिंह राठौरले उद्घाटन गरेका थिए । सो अवसरमा बोल्दै सहमहामन्त्री राठौरले नेपाली कांग्रेसले थारूलगायत सबै आदिवासी जनजातिहरूको हक अधिकारका लागि २०१५ सालदेखि नै आवाज उठाउँदै आएको बताए । समावेशी तथा समानुपातिक सिद्धान्तलाई संवैधानिकरूपमा व्यवस्था गर्ने काम पनि कांग्रेसले गरेको बताउँदै उनले प्राप्त उपलब्धिलाई संस्थागत गर्दै थप हक अधिकारका लागि सबै संगठित हुनुपर्ने बताए । कमैया, कम्लहरी मुक्तिलगायत थारू अधिकारका लागि थारू आयोग बनाउने काम पनि कांग्रेसले नै गरेको राठौरले बताए ।
जिल्ला सभापति नारायणप्रसाद गौडेलले जातीय र भावनात्मकरूपमा नभइ पार्टीले पार्टीमा काम गरेको आधारमा पार्टीका नेता तथा कार्यकर्ताहरुको मूल्यांकन हुने बताए । क्षेत्रीय सभापति पोषण केसीले थारू इतिहास र थारू हक अधिकारका बारेमा पार्टीले खेलेको भूमिकाका बारेमा बोल्दै परिवर्तनपछि बनेको संघीय लोकतान्त्रिक गणतन्त्रात्मक संविधानमा थारूलगायत सबै जातजाति, भाषा, धर्म, संस्कृतिको वैधानिकरूपमा संरक्षण भए जस्तै पार्टीले पनि सोहीबमोजिम विधान संशोधन गरी समावेशी तथा समानुपातिक सिद्धान्तलाई आत्मसात गर्दै थारूलगायत सबै आदिवासी जनजाति, महिला, मधेसी, मुस्लिम र पिछडिएको वर्गलाई स्थानीय तहदेखि केन्द्रसम्म न्यायोचितरूपमा सहभागितामूलक प्रतिनिधित्व सुनिश्चितता गरेको बताए ।
अन्तरक्रिया कार्यक्रममा डा. कृष्णराज चौधरी सर्वहारीले थारू समुदायको हक अधिकारका लागि नेपाली कांग्रेसको भूमिका विषयक कार्यपत्र प्रस्तुत गरेका थिए । थारू समन्वय शाखा प्रमुख गंगाराम थारूको अध्यक्षतामा सम्पन्न कार्यक्रममा नेपाली कांग्रेस लुम्बिनी प्रदेश कार्यसमिति सदस्य अञ्जना पाण्डे, जिल्ला सहसचिव विनोद थारू, महाधिवेशन प्रतिनिधिद्वय लाहुराम थारू र संगीता थारू, प्रदेश (ख) का सभापति बलराम शर्मा, थारू नेता जागेश्वर चौधरी, नेपाली कांग्रेस राप्तीसोनारी गाउँपालिका सचिव सन्तोष चौधरीलगायत थारूका अगुवा नेता तथा कार्यकर्ताहरू अन्तरक्रिया कार्यक्रममा सहभागी भएका थिए ।