कोहलपुरमा गुण्डागर्दीः युवाहरुको आक्रमणबाट एक गम्भीर घाइते

कोहलपुर (बाँके) ।

होलीको दिन कोहलपुर नगरपालिका–११, हरियाली मार्गमा एक युवालाई कुटपिट गरी घाइते बनाइएको छ । चार/पाँचजनाको एक समूहले जाजरकोटस्थित बारेकोट गाउँपालिका ३ का ३५ वर्षीया अमरबहादुर खड्कालाई कुटपिट गरी घाइते बनाएका हुन् ।

हुम्लाको चंखेली गाउँपालिका ३ का २४ वर्षीया मुकुन्द चौलागाई र कोहलपुर नगरपालिका १२ बस्ने २२ वर्षीया रोहित मगरसहितको उक्त समूहले उनलाई सिसाको बोतल प्रहार गरी घाइते बनाएका इलाका प्रहरी कार्यालय कोहलपुरले जनाएको छ ।

चौलागाई र मगरलाई नियन्त्रणमा लिई अनुसन्धान गरिरहेको इलाका प्रहरी कार्यालय कोहलपुरका प्रहरी नायब उपरीक्षक (डिएसपी) सुन्दर तिवारीले जनाए । उनका अनुसार अन्य खोजी भइरहेको छ ।

उनको थप उपचारका लागि नेपालगन्जस्थित नर्सिङ होममा पठाइएको छ । कुटपिटबाट घाइते भएका उनलाई गहिरो चोट लागेको छ ।