24 June 2024  |   सोमवार, असार ११, २०८१

छैटौँ बाँसगढी महोत्सव सुरु

मिसनटुडे संवाददाता
प्रकाशित मितिः सोमवार, माघ १, २०८०  

मधुर पौडेल। बाँसगढी।
बाँसगढी उद्योग वाणिज्य संघले आयोजना गरेको छैटौँ बाँसगढी कृषि, पर्यटन, व्यापार मेला तथा बर्दिया माघ महोत्स–२०८० आइतबारदेखि सुरु भएको छ । एक समारोहका बीच नेपाल सरकारका उपप्रधान तथा रक्षामन्त्री पूर्णबहादुर खड्काले शान्तिको प्रतीक परेवा उडाएर र पानसमा बत्ती बालेर बाँसगढी महोत्सवको उद्घाटन गरेका हुन् ।

उद्घाटनपछि सभालाई सम्बोधन गर्दै उपप्रधानमन्त्री खड्काले थारू जातिको परम्परा, संस्कृति, खानपान, भेषभूष, कला, सीपको संरक्षण गर्न महोत्सवले महत्वपूर्ण भूमिका खेल्ने विश्वास व्यक्त गरे । उनले बाँसगढीमा रहेको थारू होमस्टेमा आन्तरिक र बाह्य पर्यटकलाई आकर्षित गर्नसके यस क्षेत्रको विकास, रोजगारी र आय–आर्जनमा निकै फाइदा पुग्नसक्ने बताए । त्यसका लागि आफू सहयोग गर्न प्रतिबद्ध रहेको उनले जनाए ।

कार्यक्रममा बाँसगढी नगरपालिकाका प्रमुख खड्कबहादुर खड्काले महोत्सवले थारू समुदायको मौलिक सांस्कृतिक पक्षलाई उजार गर्न ठूलो भूमिका खेल्ने बताए । उनले प्रसिद्ध मन्दिर केदारेश्वर धाम दर्शन गर्न र घुम्न आउने पर्यटकलाई मध्यनजर गर्दै अगाडि सारिएका योजनामा बाँसगढी नगरपालिकाले हातेमालो गर्ने जनाए ।

कार्यक्रममा थारूलगायत विभिन्न समुदायका संस्कृति झल्किने सिंगारु, लहरे, सरंगे नाच, पञ्चेबाजासहितका झाँकी प्रस्तुत गरिएको थियो । झाँकीसहितको ¥याली बाँसगढी बजार परिक्रमा गर्दै उद्घाटन स्थलमा पुगेको थियो । संघका अध्यक्ष बद्रीनाथ बरालको अध्यक्षतामा भएको उद्घाटन कार्यक्रमको सञ्चालन महासचिव विकास गौतमले गरेका थिए ।

माघ ९ गतेसम्म सञ्चालन हुने मेलामा सूचना प्रविधि, कृषि उपज, जडिबुटी, शैक्षिक प्रदर्शनी, पर्यटन, हस्तकला, लघु उद्योग, सेवामूलक संघसंस्था, बैंक–वित्तीय तथा सहकारी संस्था, होटल रेस्टुरेन्ट, मौलिक कला संस्कृति, थारू गाँउलगायत गरी १ सय ५० स्टल वटा स्टल रहेका छन् । महोत्सव प्रवेशका लागि १ सय रुपैयाँ शुल्क तोकिएको छ । विद्यार्थी, अपाङ्गता भएका व्यक्ति तथा ज्येष्ठ नागरिकलाई निःशुल्क प्रवेशको व्यवस्था रहेको आयोजकले जनाएको छ ।

महोत्सवको दोस्रो दिन माघ १ गते सोम्बार गायक चक्र बम, सदीक्षा चौधरी, सोनु थारू, नरेश जोगीलगायत कलाकारहरूको प्रस्तुति रहने मेला प्रचारप्रसार समितका संयोजक सन्जु वलीले जानकारी दिए ।

प्रकाशित मितिः सोमवार, माघ १, २०८०     9:52:20 AM  |