अवैध ई–रिक्सा नियन्त्रणमा कठोर उपमहानगर, डोजरले किचेर नष्ट

नेपालगन्ज।
नेपालगन्ज उपमहानगरपालिकाले नियन्त्रणमा लिइएका अवैध ई–रिक्सा नष्ट गर्न सुरु गरेको छ । लामो समयदेखि ई–रिक्सा व्यवस्थापनमा लागेको नेपालगन्ज उपमहानगरपालिकाले आवश्यक कागजात र वैधता पुष्टि गर्न नसकेका ई–रिक्सा नष्ट गर्न सुरु गरेको हो । मंसिर १९ गतेदेखि अवैध ई–रिक्सा नियन्त्रण अभियान थालेको नेपालगन्ज उपमहानगरपालिकाले आज ५ वटा ई–रिक्सा नष्ट गरेको छ ।

आवश्यक कागजात नभएका ती ई–रिक्सा प्राविधिक जाँच गरी नष्ट गरिएको हो । भे१स ५४९८, भे१स ८७५१, भे१स ४८, भे१स १५३१ र गाविस ०२ नम्बरको ई–रिक्सा जेसिबीले नष्ट गरेको नगर प्रहरी प्रमुख सूर्यबहादुर बोगटीले जानकारी दिए । यातायात कार्यालय बाँकेका मेकानिकल सुपरभाइजर सुशील शर्माले ई–रिक्सा धनी र चालककै अगाडि कागजात अद्यावधिक भए÷नभएका, चेसिज नम्बर मिले÷नमिलेको वा भए÷नभएको प्राविधिक जाँच गरेका थिए ।

नेपालगन्ज उपमहानगरपालिकाले ई–रिक्सा नियन्त्रण गर्नुअघि पटक–पटक प्रक्रिया पु¥याउन आग्रह गरेको थियो । नियन्त्रणमा लिइसकेपछि पनि १५ दिने सूचना जारी गरेर ई–रिक्सा अद्यावधिक गर्न समय दिइएको थियो । नगर प्रमुख प्रशान्त विष्टले नगरमा अवैध ई–रिक्सा गुड्न पूर्णरूपमा प्रतिबन्ध लगाउने अभियानमा नेपालगन्ज उपमहानगरपालिका दृढ भएर लागेको बताए ।

‘हामीले पटक–पटक भनेको हौँ, अद्यावधिक गर्न समय पनि दिएका थियौँ, नियन्त्रणमा लिइएका धेरै ई–रिक्साले आवश्यक कागजात अद्यावधिक गरेपछि हामीले छोडेका छौँ, अवैध ई–रिक्सा हामीले नष्ट गर्न सुरु गरेका छौँ,’ नगर प्रमुख विष्टले भने, ‘अब हामी निरन्तर अगाडि बढ्छौं, नीति नियम र कानुनभन्दा बाहिर गएर चल्ने छुट कसैलाई छैन ।’नेपालगन्ज उपमहानगरपालिकाले हालसम्म ६ सय २३ ई–रिक्सा नियन्त्रण लिएको छ ।

तीमध्ये आवश्यक कागजात र प्रक्रिया पु¥याएपछि ५ सय ३८ ई–रिक्सा फिर्ता भएका छन् । अझै पनि ८५ वटा ई–रिक्सा नियन्त्रणमै छन् । ती ई–रिक्सामाथि पनि छानबिन भइरहेको नगर प्रहरी प्रमुख बोगटीले बताए । ई–रिक्सा नियमनमा कठोर बन्दै नगरपालिकाले अवैध ई–रिक्सामाथि डोजर चलाएको विषयमा अनेक प्रश्न उठाइएको छ ।