17 April 2024  |   बुधबार, बैशाख ५, २०८१

गंगामाला देउती बज्यैमा मंसिर पूर्णिमा मेला

मिसनटुडे संवाददाता
प्रकाशित मितिः बुधबार, पुस ११, २०८०  

कोहलपुर।
राप्ती सोनारी गाउँपालिका–८ ओवरीस्थित कालीमाटी गंगामाला देउती बज्यै मन्दिर परिसरमा सोमबारदेखि सञ्चालित मंसिर पूर्णिमा मेलाको आज समापन हुँदै छ । सोमबार एक समारोहका बीच गाउँपालिका अध्यक्ष तप्तप्रसाद पौडेलले मेलाको उद्घाटन गरेका थिए ।

सो मेलाको समापन भने लुम्बिनी प्रदेशकी नवनियुक्त खानेपानी, ग्रामीण तथा सहरी विकासमन्त्री कृष्णा केसी (नमुना)ले गर्ने जनाइएको छ ।
मेलाका अध्यक्ष हर्कबहादुर विष्टको अध्यक्षतामा सम्पन्न सो उद्घाटन कार्यक्रममा वडा नम्बर ८ का अध्यक्ष शालिकराम डाँगी र गाउँपालिकाकी पूर्वउपाध्यक्ष धनीकुमारी खत्रीले शुभकामना मन्तव्य व्यक्त गरेका थिए ।

सो अवसरमा विभिन्न सांस्कृतिक कार्यक्रमको आयोजना गरिनुका साथै भलिबल प्रतियोगिता पनि गरिएको थियो । मेलामा गायक एलिना चौहानले आफ्नो प्रस्तुति दिएकी थिइन् । आज हुने समापन समारोहमा प्रतियोगिताका विजयीहरूलाई पुरस्कारसमेत वितरण गरिनेछ ।
देउतीबज्यै मन्दिरमा पुस ९ गतेदेखि नै बलि दिएर पूजाआजा गरिँदै आएको थियो ।

प्रकाशित मितिः बुधबार, पुस ११, २०८०     9:21:09 AM  |