मिसनटुडे संवाददाता
प्रकाशित मितिः शुक्रबार, कार्तिक २४, २०८०
नेपालगन्ज ।
नेपालगन्ज उपमहानगरपालिका–१३ ट्राफिकचोकमा भारतीय ट्रकले ठक्कर दिँदा सोही ठाउँमा होटल व्यवसाय गर्ने खुमानन्द काफ्लेको निधन भएको छ ।
बुधबार राति ९ बजेदेखि नेपालगन्जबाट जमुनाह फर्किदै गरेको ट्रकले उनलाई ठक्कर दिएको नेपालगन्जस्थित ट्राफिक कार्यालयले जनाएको छ ।
दुर्घटनामा घाइते भएका काफ्लेलाई उपचारका लागि अस्पताल भर्ना गरिएको थियो ।
तर उपचार सम्भव भएन । निधन भएका काफ्लेले चिन्ताहरण रेष्टुरेन्ट चलाउँदै आएका थिए । महेन्द्र बहुमुखी क्याम्पसमा समेत होटल चलाएका उनलाई धेरै विद्यार्थीले ‘काफ्ले बा’ भनेर सम्बोधन गर्थे ।
होटल व्यवसायी संघ बाँकेका वरिष्ठ सल्लाहकारसमेत रहेका उनको निधनले स्तब्ध बनाएको संघका अध्यक्ष रंग खड्काले बताए ।