मिसनटुडे संवाददाता
प्रकाशित मितिः सोमवार, साउन ८, २०८०
नयाँदिल्ली ।
भारतको मणिपुरमा महिलामाथि भएको दुर्व्यवहारमा संलग्नताको आरोपमा ६ जना पक्राउ परेका छन् । मणिपुर प्रहरीका अनुसार शनिबार १ जनासहित हालसम्म ६ आरोपितलाई पक्राउ गरिएको हो । आरोपितमा १ जना नाबालिग पनि छन् ।
मणिपुरमा केही महिनायता चर्किएको जातीय हिंसाका क्रममा कुकी समुदायका दुई महिलालाई निर्वस्त्र बनाएर घुमाइएको भिडियो सार्वजनिक भएको थियो । हिंसा भड्किएको दोस्रो दिन गत मे ४ मा उनीहरूमाथि दुर्व्यवहार भएको थियो भने एक युवतीमाथि सामूहिक बलात्कार भएको भन्दै उजुरी पनि दर्ता भएको छ ।
भिडियो सार्वजनिक भएपछि भारतभर आक्रोश फैलिएको थियो । मणिपुर प्रहरीले बाँकी आरोपितलाई पक्राउ गर्न सन्दिग्ध क्षेत्रमा छापा मारिरहेको बताएको छ । यस्तै, मणिपुरका विभिन्न जिल्लामा हिंसामा संलग्न भएका ३ सय ६ जनालाई पनि प्रहरीले पक्राउ गरेको छ ।