14 June 2024  |   शुक्रबार, असार १, २०८१

जन ज्ञान ज्योतिमा ‘प्रविधियुक्त कक्षा कोठा’ का अवधारणा

मिसनटुडे संवाददाता
प्रकाशित मितिः शुक्रबार, असार २२, २०८०  

कोहलपुर,  जन ज्ञान ज्योति माध्यमिक विद्यालयले प्रविधियुक्त कक्षा कोठाको अवधारणा अघि सारेको छ । शिक्षण प्रक्रियालाई समय सुहाउँदो प्रविधिमैत्री बनाउने उद्देश्यले प्रविधियुक्त कक्षा कोठाको अवधारणा अघि सारिएको हो ।
उक्त अवधारणाअनुसार प्रविधियुक्त कक्षा कोठा निर्माणको कार्य सुरु भएको विद्यालयले जनाएको छ ।

विद्यालयकी प्रधानाध्यापक सुमीत्रा न्यौपानेले २१औँ शताब्दीमा समय सुहाउँदो पठनपाठनका लागि बाँके जिल्लामै नयाँ अवधारणा अघि सारिएको बताइन् । यसले विद्यार्थीमा प्रविधिको ज्ञान हुनुका साथै प्रविधिसँग अभ्यस्त हुने र प्रयोगात्मक शिक्षा प्रदान हुने उनको भनाइ छ ।

प्रविधियुक्त कक्षा कोठा निर्माणका क्रममा कक्षा १०, ११ र १२ मा स्मार्ट बोर्ड जडान भइसकेको प्रधानाध्यापक न्यौपानेले बताइन् । ती कक्षाहरुमा डिजिटल पठनपाठन र शिक्षणका लागि शिक्षक र विद्यार्थीहरुलाई तालिम प्रदान गर्न सुरु गरिएको उनको भनाइ छ । उक्त सिकाइमा कक्षा १०, ११ र १२ मा अध्ययनरत विद्यार्थीहरु पनि सहभागी छन् ।


उक्त कार्यक्रमकै लागि विद्यालयले यस वर्ष तीनवटा स्मार्ट बोर्ड खरिद गरेको छ । गत वर्ष खरिद गरिएको एकवटा गरी चारवटा स्मार्ट बोर्ड जडान भइसकेका उनको भनाइ छ । यस्तै पठनपाठनका लागि आवश्यक पाँचवटा प्रोजेक्टर खरिद गरेर जडान गर्ने तयारी भइरहेको प्रधानाध्यापक न्यौपानेले मिसन टुडे दैनिकसँग बताइन् ।

‘जन ज्ञान ज्योति माविलाई डिजिटल विद्यालय बनाउने हाम्रो उद्देश्य छ । सोहीअनुसार प्रक्रिया अघि बढिरहेको छ,’ उनले भनिन्, ‘बिस्तारै हाम्रो योजना पूरा हुँदैछ । सबैबाट सहयोगको अपेक्षा गरेका छौं ।’ न्यौपानेले एक वर्षअघि उक्त विद्यालयको नेतृत्व सम्हालेकी थिइन् ।

प्रकाशित मितिः शुक्रबार, असार २२, २०८०     7:51:41 AM  |