23 July 2024  |   मङ्लबार, साउन ८, २०८१

बाँकेका ठकुरीको निर्णायक गोलले नेपाल फाइनलमा

मिसनटुडे संवाददाता
प्रकाशित मितिः बुधबार, चैत्र १५, २०७९  

कोहलपुर, बाँकेस्थित खजुराका दिपकराज सिंह ठकुरीको निर्णायक गोलले नेपाल काठमाडौंमा जारी थ्री नेशन्स कपको फाइनलमा प्रवेश गरेको छ । मंगलबार साँझ दशरथ रंगशालामा भएको खेलमा भुटानसँगको खेलमा ठकुरीले निर्णायक गोल गरेपछि नेपाल फाइलनमा प्रवेश गरेको हो ।


उनले खेलको ८९औँ मिनेटमा नेपाली राष्ट्रिय टिमका लागि पहिलो डेब्यु गोल गरे । बाँकेका ठकुरीको मंगलबारको खेल नेपाली राष्ट्रिय टिमका लागि दोस्रो खेल थियो । राष्ट्रिय टिममा स्थान बनाएको दोस्रो खेलमै उत्कृष्ट खेल प्रदर्शन गर्दै ठकुरीले नेपाललाई हारबाट जोगाए । भुटानविरुद्ध नेपालको यो पहिलो बराबरी हो ।

यसअघि नेपाल र भुटानबीच भएको खेलमा नेपालले १२औँपटक जीत हासिल गरेको छ । ठकुरीले थ्री नेशन्स कपअन्तर्गत लाओसविरुद्धको खेलमा नेपाली राष्ट्रिय टिमका लागि डेब्यु गरेका थिए । दीपकले अहिले ए डिभिजन लिग खेलिरहेका छन् । लिगमा उनले पाँच खेलमा चार गोल गरिसकेका छन् ।

मंगलबार खेलमा ठकुरीले दोस्रो हाफमा अञ्जन विष्टको स्थानमा मैदान प्रवेश गरेका थिए । वैकल्पिक खेलाडीको रुपमा मैदान छिरेका ठकुरीको निर्णायक गोल भुुटानलाई घर फर्काउन पर्याप्त भयो । उनले नेपालका मिडफिल्डर अनन्त तामाङको हेड पासमा निकै सुन्दर हेडर गोल गरे । दोस्रो हाफको इन्जुरी समयमा ठकुरीले दोस्रो गोल गरे पनि उक्त गोलले मान्यता पाएन । रेफ्रीले उनलाई अफसाइट देखाइदिए ।

त्यसअघि भुटान नेपालसँग १–० गोलले अघि थियो । त्रिपुरेश्वरस्थित दशरथ रंगशालामा भएको खेलको २०औँ मिनेटमा नेपालले गोल खाएको थियो । भुटानका दावा छिरिङको कर्नरमा तेन्जिङ नोर्बुले खेलको २०औँ मिनेटमा गोल गर्दै भुटानलाई अग्रता दिलाएका थिए । बाँकेका ठकुरीको गोलको प्रेरणाले नेपालले कपको फाइलनमा लाओससँगको भिडन्त पक्का ग¥यो ।

प्रकाशित मितिः बुधबार, चैत्र १५, २०७९     12:57:20 PM  |