कोहलपुर, २५ माघ
५औँ अन्तर माध्यमिक विद्यालयस्तरीय उपमेयर कप छात्रा क्रिकेट प्रतियोतिता बिहीबार (आज) देखि सुरु हुँदैछ । कोहलपुर नगरपालिकाको आयोजनामा उक्त क्रिकेट प्रतियोगिता सुरु हुन लागेको हो ।
प्रतियोगिताको आज बिहान ११ः३० मा औपचारिकरुपमा उद्घाटन हुने कोहलपुर नगर खेलकुद विकास समितिले जनाएको छ । अध्यक्ष बुद्धिबहादुर थापामगरका अनुसार प्रतियोगितामा कोहलपुर क्षेत्रका डेढ दर्जन टिमको सहभागिता रहनेछ । प्रतियोगिताको पूर्वसन्ध्यामा आयोजित पत्रकार सम्मेलनमा बोल्दै अध्यक्ष थापामगरले सम्पूर्ण तयारी पूरा भएको बताए । समितिद्वारा आयोजित पत्रकार सम्मेलनमा बोल्दै उनले प्रतियोगिता भव्य तथा सभ्यरुपमा सम्पन्न गरिने बताए ।
कोहलपुर नगरपालिकाका प्रमुख प्रशासकीय अधिकृत टीकाराम ढकालले कोहलपुर नगरपालिकाले खेलकुद क्षेत्रलाई प्राथमिकता दिएको बताए । उनका अनुसार छात्राहरुको क्षमता प्रस्फुटन तथा प्रोत्साहनका लागि प्रतियोगिता सञ्चालन हुन लागेको हो । यस्तै नगरपालिकाले राष्ट्रिय स्तरको प्रतियोगिता सञ्चालन गर्ने तयारीसमेत गरेको उनले बताए । उक्त अवसरमा बोल्दै कोहलपुर नगरपालिका सामाजिक विकास समितिका संयोजक ईश्वरीप्रसाद विश्वकर्माले प्रतियोगिताले कोहलपुरका विद्यालयस्तरीय छात्राहरुलाई जिल्ला तथा देशव्यापीरुपमा हुने प्रतियोगितामा सहभागिताका लागि प्रोत्साहन गर्ने बताए ।
खेलकुलमा लैंगिक समानता कायम गर्नका लागि प्रतियोगिताको आयोजना हुन लागेको हो । कोहलपुर नगर खेलकुद विकास समितिको सञ्चालन तथा व्यवस्थापनमा हुने प्रतियोगिताका खेल आइसीसीका नियमअनुसार खेलाइने छ । अध्यक्ष थापाले प्रतियोगिताको सबै खेलका ‘प्लेअर अफ द म्याद’ लाई नगद एक हजार रुपैयाँ प्रदान गरिने बताए । यस्तै प्रतियोगितामा ‘प्लेअर अफ द सिरिज’, ‘वेष्ट बलर’ र ‘वेष्ट ब्यानर’लाई समेत नगद पुरस्कार प्रदान गरिनेछ । प्रतियोगितामा ‘इमरर्जिग प्लेअर’लाई ट्रफी प्रदान गरिनेछ । यस्तै प्रतियोगितामा प्रथम स्थान हासिल गर्ने टिमले नगर २१ हजार र द्वितीय हुने टिमले ११ हजारसहित ट्रफी र मेडल प्राप्त गर्नेछन् ।