बाँसगढी, २४ माघ
पाँचौ राष्ट्रपति रनिङ शिल्ड प्रतियागिता–२०७९ को उपाधि नेपाल राष्ट्रिय माध्यमिक विद्यालय लक्ष्मणपुरले जितेको छ । बाँसगढी नगरपालिकाको आयोजना र राम जानकी मावि भैसासुरको संयोजनमा सञ्चालन भएको प्रतियोगिताको उपाधि वडा नम्बर ४ मा रहेको नेरामावि लक्ष्मणपुरले उपाधि जितेको हो ।
नगरस्तरीय खेल मैदान रिहारपुरमा सञ्चालन भएको प्रतियोगितामा उपाधि जितेको उक्त विद्यालय १७ स्वर्ण आठ रजत नौ कास्य पदकसहित पाँचौंपटक उपाधि जितेको छ । नेपाल राष्ट्रिय माध्यमिक विद्यालय लक्ष्मणपुरले यसअघि चारपटक उपाधि जितिसकेको छ । प्रतियोगितामा आठ स्वर्ण, नौ रजत र तीन कास्य पदकसहित बाँसगढी नगरपालिका वडा नम्बर १ स्थित लक्ष्मी माध्यमिक विद्यालय दोस्रो भएको छ । यस्तै सात स्वर्ण तीन रजत र ६ कास्य पदकसहित नेरामावि बाँसगढी तेस्रो भयो ।
प्रतियोगिताको समापन समारोहमा बोल्दै नगरपालिका नगरप्रमुख खड्कबहादुर खड्काले राष्ट्रपति रनिङ शिल्ड प्रतियोगिताले पालिकालाई जिल्ला हँुदै प्रदेश र देशभरि नै चिनाउने एक अवसरका रुपमा लिनुपर्ने बताए । उनले खेलाडीहरुलाई अनुशासनमा रहेर उत्कृष्ट खेल प्रदर्शन गर्न आग्रह गरे । साथै खड्काले विद्यालयले प्रतियोगिताको बेलामात्र विद्यार्थीलाई खेलकुद गतिविधिमा सहभागी गराउने गरेको भन्दै अन्य समयमा पनि खेलमा लगानी गर्न विद्यालयलाई निर्देशन दिए । उनले शैक्षिक गुणस्तरसँगै अतिरिक्त क्रियाकलापमा पनि पालिका विद्यालयलाई साथ सहयोग गर्न तयार रहेको प्रतिबद्धता व्यक्त गरे ।
यसैबीच, राष्ट्रपति रनिङ शिल्ड प्रतियोगिताको विजेता विद्यालय लक्ष्मणपुरका प्रध्यानाध्यापक अर्जुन तिवारीले विद्यार्थीको मेहनत र चौथो पटकसम्म लगातार विजेता बनेको कारण पनि यस वर्ष विजेता बन्न सहज भएको तिवारीले बताए । प्रतियोगितामा सहभागी खेलाडीहरुले भलिबल, कराँते, विभिन्न दौड, तेक्वान्दो, एथ्लेटिक्सलगायतका विधामा विद्यार्थीहरु सहभागी थिए । राष्ट्रपति रनिङ शिल्ड प्रतियोगितामा नगरभित्रका ३२ वटा मावि र आधारभूत विद्यालयहरु सहभागिता थियो ।