मोडेल र न्यू डाँफे क्लब क्वाटरफाइनलमा

नेपालगन्ज, २३ माघ
दोस्रो स्वर्गीय श्याम थापा स्मृति फुटबल प्रतियोगितामा सोमबार मोडेल क्लब र न्यू डाँफे क्लबले जित हासिल गरेका छन् ।जितसँगै मोडेल क्लब र न्यू डाँफे क्लब प्रतियोगिताको क्वाटरफाइनलमा प्रवेश गरेका छन् ।
खजुरा गाउँपालिका वडा नम्बर १ मैटहवा मावि सैनिकको खेलको मैदानमा मोडेलले एफसी–११ बर्दियालाई २–१ ले पराजित गरेको छ । मोडेलका लागि मनु थापाले दुवै गोल गरे । उनले १७औँ मिनेट र २३औँ मिनेटमा गोल गरे । एफसी–११का लागि मोहन विकले ४०औं मिनेटमा गोल गरे ।

यसैगरी अर्को खेलमा न्यू डाँफे क्लबले रारा जनचेतना युवा क्लबलाई ४–२ गोल अन्तरले पराजित गरेको छ । न्यू डाँफेका लागि सुदीप विकले २ गोल गरे । उनले खेलको ३६औं र ४६औं मिनेटमा गोल गरे । डाँफेका लागि मनिष थापा र सुनिल खड्काले १–१ गोल गरे । मनिषले ५८औं र सुनिलले ७०औं मिनेटमा गोल गरे ।
यता रारा जनचेतनाका लागि ललित रानामगरले ३४औं र अशोक सारु मगरले ५५औं मिनेटमा गोल गरे । प्रतियोगिताअन्तर्गत मंगलबारको पहिलो खेलमा एसएसएफए दाङ र सहारा क्लब इन्डियाबीच प्रतिस्पर्धा हुनेछ ।