21 February 2024  |   बुधबार, फाल्गुन ९, २०८०

नेपालगन्जमा भएको बम विष्फोटमा संलग्न विप्लवका कार्यकर्ता

मिसनटुडे संवाददाता
प्रकाशित मितिः बिहिबार, मंसिर १, २०७९  

नेपालगन्ज
नेपालगन्ज १० कोरियनपुरमा बम विष्फोटको घटनामा विप्लव नेतृत्वको समूहको संलग्नता रहेको पुष्टि भएको छ । स्वास्थ्य कार्यालय बाँके नजिकै बुधबार राती करिब ८ बजेतिर बम विष्फोट हुँदा घाइते भएका दुईजना विप्लव नेतृत्वको समूहका विद्यार्थी संगठनमा अबद्ध रहेको खुलेको हो ।

उक्त घटनामा सल्यानका डिल्लीबहादुर डिसी र कैलालीका धर्मराज सुनार घाइते भएका छन् । घाइते सुनार र क्षेत्री नेत्रविक्रम चन्द नेतृत्वको विप्लप समुहका कार्यकर्ता रहेको र उनीहरुले बम बनाउने क्रममा विस्फोट हुन गएको पाइएको प्रहरीले जनाएको छ ।

सो विस्फोटमा परेर घाइते क्षेत्री विप्लव समुहको विद्यार्थी संगठनका बाँके जिल्ला अध्यक्ष रहेको र सुनार संगठनका कार्यकर्ता रहेको खुलेको जिल्ला प्रहरी कार्यालय बाँकेका प्रवक्ता रामप्रसाद घर्ती मगरले जानकारी दिए । भाडामा बस्दै आएका उनीहरुको कोठाबाट प्रहरीले चन्दा ठेली तथा अन्य कागजपत्र समेत बरामद गरेको जनाएको छ । बम बनाउने कार्यमा संलग्न अन्य ३ जना फरार भएको पनि प्रहारीले जनाएको छ ।

घाइतेहरुको भेरी अस्पतालमा प्रारम्भिक उपचारपछि नेपालगन्ज मेडिकल कलेजमा उपचार भइरहेको छ । सुरुमा ग्याँस विष्फोट भएको आशंका गरिएपनि घटनापछि प्रहरी पुग्दा बम विष्फोट भएको पुष्टि भएको थियो । प्रहरीले विष्फोट भएको कोठाबाट निर्माण भईसकेको दुईथान बम र बम बनाउने सामाग्री बरामद गरेको थियो ।

ती बमहरु नेपाली सेनाको बज्रदल गण राँझाबाट आएको टोलीले पहिलो राती १०ः४० बजे र बम ११ः०९ बजे डिस्पोज गरेको थियो ।
निर्वाचनलाई बिथोल्ने उद्देश्यले ती बमहरु बनाइएको हुनसक्ने आशंका गरिएको छ ।

विष्फोटको घटनाले बाँकेमा सुरक्षा व्यवस्थामाथि प्रश्न उठाएको छ । बम बनाउने सामग्री भारतबाट भित्र्याइएको हो भने प्रहरीले सीमामा निगरानीमा कडाई गर्न चुकेको पुष्टि हुन्छ ।

प्रकाशित मितिः बिहिबार, मंसिर १, २०७९     10:25:26 AM  |