16 April 2024  |   बुधबार, बैशाख ५, २०८१

बर्दियाका ४ वडामा बाढी पस्यो: ७० भन्दा धेरै घरपरिवार विस्थापित, उद्दारका लागि सुरक्षाकर्मी परिचालन

मिसनटुडे संवाददाता
प्रकाशित मितिः शुक्रबार, अशोज २१, २०७९  

बर्दिया ।

बर्दिया जिल्लामा बबई नदीको पानी बस्तीमा पसेपछि ७० भन्दा बढी घरपरिवार विस्थापित भएका छन्। जिल्लाको गुलरिया नगरपालिका वडा नम्बर ५, ८, ११ र १२ नम्बर वडामा बबईको बाढी पसेपछि उनीहरू विस्थापित भएका हुन्।

लुम्बिनी प्रदेश प्रहरी कार्यालय तुलसीपुर दाङका प्रहरी निरीक्षक रामबहादुर जिसीका अनुसार वडा नम्बर ५ मा ३५, वडा नम्बर ८ मा २४, वडा नम्बर ११ मा १२ र वडा नम्बर १२ मा ३ घर डुबानमा परेको भन्ने सूचना प्राप्त भएको छ।

वडा नम्बर ५ का विस्थापितहरूलाई स्थानीय शान्ति आधारभूत विद्यालयमा, वडा नम्बर ८ र ११ कालाई नेपाल रेडक्रस सोसाइटीले प्रदान गरेको त्रिपालको पाल टाँगेर अग्लो स्थान सडकको सुरक्षित स्थानमा र वडा नम्बर १२ काहरू आफन्तको घरमा आश्रय लिइरहेको सूचना प्राप्त जानकारी उनले दिए।

जिल्ला प्रहरी प्रमुख एसपी वीरेन्द्रबहादुर शाहीले २५० जति स्थानीय बाढी घरमा पसेपछि विस्थापित भएको र उनीहरूलाई सुरक्षित स्थानमा स्थान्तरण गरिएको बताए। उनका अनुसार केही विद्यालयमा, केही मानव बचाउ घरमा बसेका छन् र केही विस्थापितहरू आफन्तकोमा आश्रय लिइरहेका छन्।

डुबानमा परेकाहरूको उद्धारका लागि प्रहरी, सशस्त्र प्रहरी र नेपाली सेना खटिएको उनले बताए। अहिले पनि पानी पर्ने क्रम जारी छ। बबईको बाढी र निरन्तर वर्षाका कारण घर डुबानमा परेको तर बिहीबारको तुलनामा शुक्रबार बाढीको सतह घटेको उनले जानकारी दिए।

प्रकाशित मितिः शुक्रबार, अशोज २१, २०७९     11:51:35 AM  |