27 November 2020  |   शुक्रबार, मंसिर १२, २०७७

नाकामा धर्ना दिने मान्छे घट्दै गएपछि नाका खुला

मिसनटुडे संवाददाता
प्रकाशित मितिः शुक्रबार, मंसिर २५, २०७२  

केशव राना
कोहलपुर, मंसिर २५
नेपालगञ्ज–रुपैडिहा नाकामा धर्ना दिने कार्यकर्ताहरु घट्दै गएका छन् । आंशिक रुपमा सञ्चालित नाका बिहीबार बिहानैबाट खुलेको छ ।
१२ देखि १५ जना सम्म मात्रै हुने मोर्चाका कार्यकर्ताहरु अहिले त्यो संख्यामा पनि घट्दै गएको
छ । कार्यकर्ताको संख्या घट्दै गएपछि नाकामा मोर्चाले धर्ना दिन छाडेको छ । बिहीबार कुनै रोकतोक बिना इन्धन, खाद्य तथा निर्माण सामाग्रीका गाडी नेपाल भित्रिएको प्रहरीले जनाएको
छ ।
दिनभर मोर्चाका कार्यकर्ता धर्नामा बस्ने भएपछि नाका अवरुद्ध हुँदै आएको थियो । तर, धर्नाबाट मोर्चाका कार्यकर्ता हटेलगत्तै भारतीय पक्षले सहज रुपमा गाडी पठाइरहेको छ । संघर्ष समिति बाँकेका प्रवक्ता समेत रहेका तमलोपाका केन्द्रीय सदस्य पशुपति दयाल मिश्राले धर्नामा बस्ने मान्छे नभएकाले नाका खुला गरिएको बताएका छन् । उनले भने, ‘मान्छे घट्दै गएकाले धर्ना नबसिएको हो, अब चाँडै बैठक बसेर नयाँ योजना बनाउँछौं ।’
उनले केन्द्रबाट आउने निर्देशन अनुसार नयाँ कार्यक्रम तय हुने बताए । प्रवक्ता मिश्रले भने, ‘केन्द्रमा पनि बैठक बसिरहेको छ, अब कस्तो कार्यक्रम आउँछ त्यसै अनुसार कार्यक्रम अघि बढ्छ ।’
बिहीबार साँझ सम्ममा डिजलका ३४, पेट्रोल ५, हवाई इन्धन ४ ट्यांकर र ७ वटा ग्याँस बुलेट भित्रिएका छन् । अन्य मालबाहक ट्रक समेत १ सय ९५ बढी नेपाल भित्रिएको प्रहरीले जनाएको छ ।
एक साता सम्म ठप्प रहेको जमुनाहा नाकाबाट बुधबार १८ डिजल, ५ हवाइ इन्धन, १ मट्टितेल र ३२ मालबाहक गाडीहरु भित्रिएका थिए । बिहीबार भने ठूलो संख्यामा इन्धन सहितका मालबाहक गाडीहरु भित्रिएका हुन् ।

प्रकाशित मितिः शुक्रबार, मंसिर २५, २०७२     11:56:56 AM  |

Leave a Reply

Your email address will not be published. Required fields are marked *