साइक्लिङमा मानिसको आकर्षण बढ्दैछः आले

केशर आले
संरक्षक
स्वर्गद्वारी साइक्लिङ क्लब

१. नयाँ वर्षको अवसर पारेर तपाईंहरूले साइक्लिङ प्रतियोगिताको आयोजना गर्दै हुनुहुन्छ । यसको खास उद्देश्य के हो ?

साइक्लिङका धेरै फाइदा छन् । यसले मानिसको स्वास्थ्यदेखि वातावरण संरक्षणमा महत्वपूर्ण भूमिका खेल्छ । यसलाई पर्यटनसँग जोडेर आय आर्जनको स्रोत पनि बनाउन सकिन्छ । साइक्लिङले दुर्घटना न्यूनीकरण गर्न पनि मद्दत गर्छ ।

हामीले मुख्यगरी तीन उद्देश्य राखेका छौँ, स्वास्थ्यका लागि साइकल, पर्यटन प्रवद्र्धन र राष्ट्रिय–अन्तर्राष्ट्रिय खेलाडी उत्पादन गर्ने । हामीले कोहलपुरमा साइक्लिङ सुरु गरेपछि यहीँबाट रूपा थारू र जंगु थाङ जस्ता राष्ट्रिय खेलाडीसमेत उत्पादन भएका छन् । साइकल चढ्नुुका विभिन्न फाइदाबारे आम जनमानसमा सचेतना जगाउन पनि यो प्रतियोगिताले आयोजना गरिएको हो ।

२. यहाँकै पहलमा कोहलपुरमा साइक्लिङको विकास भइरहेको छ । कसरी यतातिर आकर्षित हुनुभयो ?

मैले काठमाडौँ पोखरातिर साइकल राइड गरेको देखेको थिएँ । त्यहाँ विभिन्न क्लबहरू पनि निर्माण भएका थिए । बेलाबेला म उनीहरूले सराङ्कोट, नौडाँडालगायतका डाँडाहरूमा साइक्लिङ गरेको देख्थेँ ।

म कोहलपुर आएपछि यहाँ पनि त्यस्तै क्लब बनाउने सोच आयो । नेपालगन्जबाट हामीले यसको सुरुवात ग¥यौँ । पछि २०७६ मा कोहलपुरका केही साइक्लिस्ट जम्मा भएर क्लब खोलिएको हो ।

३. साइक्लिङमा मानिसहरूको आकर्षण कत्तिको पाउनुभएको छ ?

आकर्षण बढिरहेको छ । नेपालगन्जमा क्लब खोल्दा पहिला हामीले यहाँका उच्च तहका व्यापारी, राननीतिकर्मीलगायतलाई क्लबमा आबद्ध गराएका थियौँ । धवलशमशेर राणा, सुरेश कनौडियालगायत ३ सय जना क्लबको सदस्य हुनुहुन्थ्यो ।

कोहलपुरमा पनि विस्तारै साइक्लिस्टहरूको संख्या बढ्दो क्रममै छ । अहिले हाम्रो क्लबमा ३० जना मेम्बर आबद्ध भए पनि कोहलपुरमा साइकल चलाउनेको संख्या सयभन्दा बढी छ ।

४. आगामी दिनमा कस्ता कस्ता कार्यक्रमहरू गर्ने सोच बनाउनु भएको छ ?

वास्तवमा मेरो एउटा सपना छ । कोहलपुरमा एउटा अन्तर्राष्ट्रिय स्तरको साइक्लिङ प्रतियोगिता गर्ने । कोहलपुुरबाट सुरु गरेर रारासम्म साइक्लिस्टहरूलाई पु¥याउने मेरो सपना हो । यसमा प्रतियोगी मात्र सहभागी हुने छैनन् ।

फन राइडरहरू पनि सहभागी हुनेछन् । यदि यो काम गर्न सकियो भने अन्तर्राष्ट्रिय रूपमा यो क्षेत्रको निकै प्रचारप्रसार हुने थियो । यस क्षेत्रको पर्यटन प्रवद्र्धन गर्न त्यसले निकै सघाउ पु¥याउने थियो ।

५. साइक्लिङका लागि विशेष प्रकारका साइकलको आवश्यकता पर्छ । के सबैले त्यस्ता साइकल अफोर्ड गर्न सक्छन् त ?

हेर्नोस, अन्य सवारी साधन चढ्नुभन्दा साइकल चढ्नु आफैँमा हरेक हिसाबले फाइदाजनक छ । यसले मानिसको स्वास्थ्यमा सुधार ल्याउनुका साथै आर्थिक बचत पनि गरिरहेको हुन्छ । म तपाईलाई एउटा उदाहरण दिन्छु ।

कोहलपुरका एक जना व्यापारी सुगर रोगबाट ग्रसित हुनुहुन्थ्यो । उहाँ पछिल्लो समय नियमित साइकल चलाउनुहुन्छ । साइकल चलाउन थालेको एक वर्षदेखि उहाँको सुगर नर्मल भएको छ ।

हो, उहाँले एक डेढ लाखको साइकल किन्नुभएको होला तर उहाँको नियमित साइकल चलाउ बानीले जिन्दगीभरि औषधि खानुपर्ने सुगर त नियन्त्रित भएको छ नि ! त्यसबाट उहाँको स्वास्थ्यमा भएको सुधारले कति आर्थिक बचत भएको छ हिसाब गर्नुस् त ।

साइक्लिङ गर्नु भनेको पिच रोडभन्दा अफ रोडमा जानु हो जहाँ उकालो ओरालो पनि चलाउनुपर्ने भएकाले तिनमा गियरलगायतका सुविधा हुन्छन् । नेपालमा अहिले ३० हजारदेखि ६ लाखसम्मका यस्ता साइकल पाइन्छन् ।

कोहलपुरमै पनि ६० हजारदेखि १ लाखसम्मका साइकल साथीहरूले चढिरहनुभएको छ । जे होस् साइकलको मूल्यभन्दा पनि साइकल चढ्ने बानीको विकास गर्नु आफैँमा राम्रो कुरा हो । यसले व्यक्ति, समाज र राष्ट्र सबैलाई फाइदा गर्छ ।