4 March 2024  |   सोमवार, फाल्गुन २१, २०८०

सम्पादकीयः कोहलपुर मयेर कप केही अनुत्तरित प्रश्न

मिसनटुडे संवाददाता
प्रकाशित मितिः आइतवार, पुस १५, २०८०  

कोहलपुर नगरपालिकाको आयोजनामा चारदिने सातौं अन्तर मावि मेयर कप तथा १६औं पालिकास्तरीय राष्ट्रपति रनिङ शिल्ड छनोट प्रतियोगिता शुक्रबार समापन भएको छ । कोहलपुर खेलकुद विकास समितिको व्यवस्थापन र सञ्चालनमा भएको उक्त प्रतियोगिताको नगर प्रमुख पूर्णप्रसाद आचार्यले समापन गरेका हुन् ।

पुस १० गते नगर प्रमुख आचार्यले नै उद्घाटन गरेको सो प्रतियोगितामा विभिन्न विधाका ५० खेलका लागि प्रतिस्पर्धा भएको थियो । जसमा एक हजार बढी विद्यार्थी भाइबहिनीहरूले भाग लिएका थिए । खेलको परिणाम पनि आइसकेको छ । बालविद्या बोर्डिङ स्कुलले ८ स्वर्ण, ३ रजत र ३ कास्य पदक जित्दै नगरस्तरीय प्रतिस्पर्धामा अरू सबैलाई उछिनेको छ ।

त्यस्तै, त्रिभुवन माविले बालविद्या माध्यमिक विद्यालय भन्दा दुईवटा रजत पदक कम ल्याएर दोस्रोमा खुम्चिनुपरेको छ । त्यस्तै, गोरखा युनााइटेड तेस्रो स्थानमा आएको छ । दुई संस्थागत विद्यालयहरू प्रतिस्पर्धामा अगाडि आउँदा एउटा सामुदायिक विद्यालय मात्र अगाडि देखिएको छ । अत्यधिक विद्यार्थी चाप रहेका सामुदायिक विद्यालयहरू किन शिक्षाका साथसाथै खेलकुद र अन्य सिर्जनशील अतिरिक्त क्रियाकलापमा पनि पछि परिरहेका छन् ? यसको बहस गर्नुपर्ने बेला भएको छ ।

र अर्को, महत्वपूर्ण कुरा प्रतियोगिता उद्घाटनका क्रममा मेयर आचार्यले खेललाई सभ्य र व्यवस्थित ढंगले सञ्चालन गरिने घोषणा गरेका थिए । उनले सबै सरोकारवाला पक्षलाई सोही अनुसारको निर्देशन पनि दिएका थिए । तर उनले दिएको निर्देशनलाई पूरै लत्याइएको छ । कोहलपुर नगरपालिकाले सञ्चालन गरेको यो प्रतियोगिता यति अव्यवस्थित रूपमा सम्पन्न भएको छ कि निर्णय प्रक्रियादेखि नै अव्यवस्थाको सुरुवात भएको थियो ।

नगरपालिका बैठकले गरेको निर्णयलाई नै कार्यान्वयन गरिएन । नगर बैठकले एउटा निर्णय ग¥यो तर खेलमा भने त्यसलाई लागू गरिएन । खेल सञ्चालन अवधिमा नगरभरिका माध्यमिक तथा आधारभूत दुवै तहका सबै विद्यालय बन्द गरिने निर्णय गरिएको थियो । तर अन्तिममा अर्को सूचना जारी गरेर आधारभूत तहलाई खेल उद्घाटनका दिनबाहेक अन्य समयमा बिदा नदिने जानकारी दिइयो । यसो किन गरियो ? कसको दबाब वा प्रभावमा यसो गर्नुपरेको थियो ? थाहा छैन । खेल सुरु भएपछि पनि व्यवस्थापनका लथालिङ्गे पारा देखिइरहे ।

नगरपालिकाले खेल व्यवस्थापनका लागि मूल समिति र थुप्रै उपसमितिसमेत बनाएको थियो । के ती पत्रिकामा नाम छाप्न र व्यक्तिगत रूपमा बायोडाटा बढाउनका लागि मात्र थिए ? पत्रकारले खेलका सूचना माग्दासमेत पाउन गाह्रो थियो । प्रतियोगिताको सचिवालय संयोजक बनाइएका टीकाराम शर्मा बेलुकी फोन गर्दा ‘म बिरामी छु, म बोल्न सक्दिनँ, म घर आइसकेँ, उतै सचिवालयतिर बुझ्नोेस्’ भन्दै झर्किने गर्थे । यस्ता गैरजिम्मेवार र ‘बिरामी’ व्यक्तिलाई कसरी सचिवालय संयोजकको जिम्मेवारी दिइयो ?

अझ लाजमर्दो कुरा त कतिपय विद्यालयले फर्जी विद्यार्थी भर्ती गरेर प्रतियोगितामा सहभागी गराएको समेत खुल्न आयो । तर यसबारे नगरपालिकाले अझै औपचारिक रूपमा मुख खोलेको छैन । न ती विद्यालयको नाम सार्वजनिक गरिएको छ न त त्यस्तो कार्यमा संलग्न विद्यार्थी, शिक्षक वा प्रशिक्षकहरूलाई नै कुनै कारबाही भएको छ । विद्यालयलाई त्यो पनि ‘नगद’मा जरिवाना गरिएको गाइगुइँ समाचार बाहिर आएको छ ।

यसको मतलब पैसा तिराएपछि सजाय भयो, पैसा हुनेले जे गर्दा पनि भयो ? समापन समारोहमा मेयर आचार्यले विद्यालयले फर्जी खेलाडी प्रतिस्पर्धीका रूपमा खेलाएकोप्रति असन्तुष्टि जनाउँदै त्यस्ता विद्यालयमाथि छानबिन गरेर दोषी देखिए कारबाही गरिने बताएका छन् । उनीहरूमाथि छानबिन भइरहेको पनि उनको भनाइ छ । यो छानबिनका नाममा उनीहरूलाई उन्मुक्ति दिने प्रपञ्च त होइन ! शंका यहाँ पनि छ ।

यी यस्ता गतिविधिले नगरपालिकाको इज्जत पक्कै बढाएको छैन । यसले नगरको शाख गिराएको छ । यो खेल भनेको राष्ट्रिय अन्तर्राष्ट्रिय खेलकुदमा नगरपालिकाको सहभागिताका लागि पहिलो पाइलो हो । पहिलो पाइलोमै लड्खडाएपछि नगरको खेलकुदको भविष्य के हुन्छ ? यी यावत् क्रियाकलापले गर्दा अहिले सार्वजनिक गरिएको परिणामप्रति पनि आम कोहलपुर नगरबासीले आशंका व्यक्त गर्न थालेका छन् । त्यसैले आम कोहलपुरबासीका लागि यी अनुत्तरित प्रश्नको जबाफ कोहलपुर नगरपालिकाले प्रस्ट शब्दमा दिनै पर्छ ।

प्रकाशित मितिः आइतवार, पुस १५, २०८०     6:23:45 AM  |