4 March 2024  |   सोमवार, फाल्गुन २१, २०८०

नाकामा छेकिएनन् नेपाली ग्राहक

मिसनटुडे संवाददाता
प्रकाशित मितिः सोमवार, अशोज २९, २०८०  

नेपालगन्ज ।

टन्टलापुर घाममा घन्टौँ लाइन लाग्नुपर्ने बाध्यता । नेपाल र भारतका सुरक्षाकर्मीको ठाउँ–ठाउँ चेकजाँच । त्यही पनि नेपाली ग्राहकहरू किनमेलका लागि सीमावर्ती भारतीय बजार रुपैडियामा जान छाडेका छैनन् । क्यारिङ होस् चाहे घरायसी किनमेलका नाममा रुपैडियाका जाने ग्राहकका कारण दैनिक लाखौंको राजस्व घाटा हुनुका साथै नेपालगन्ज, कोहलपुरलगायतका बाँके जिल्लाका प्रमुख बजारहरू सुनसान रहने गरेका छन् ।

राज्यलाई राजस्व दिएर, महँगो सटर भाडा लिएर र लाखौँ लगानी गरेर व्यापार गरिरहेका स्वदेशी व्यापारीहरू भने ग्राहक नआएपछि मोबाइल हेरेर र चोकमा जम्मा भएर क्यारेमबोर्ड खेलेर दिन कटाइरहेका छन् । एक त आर्थिक मन्दीका कारण अत्यावश्यकबाहेकका सामान किन्ने ग्राहकको संख्यामा कमी आएको छ । त्यसमा पनि ग्राहक रुपैडिया दौडिएपछि कतिपय पसलमा त दिनमा एउटै ग्राहक पनि नआउने गरेको तीतो अनुभव व्यापारीहरू सुनाउँछन् ।

बडादसैंँ सुरु भइसकेको छ । अरू बेला व्यापार नभएपछि चाडपर्वका बेला कारोबार हुने आशामा हुन्छन् व्यापारी । तर अहिले चाडपर्वका बेला पनि व्यापार बढ्न नसकेको उनीहरू सुनाउँछन् । थोक कपडाको ठूलो पसल नन्कुराम होलीरामका सञ्चालक एवम् नेपालगन्ज उद्योग वाणिज्य संघका पूर्वअध्यक्ष नन्दलाल वैश्य भन्छन्, ‘बजारमा सन्नाटा छ । व्यापारीको मुहारमा मुस्कान आउन सकेको छैन ।’ पर्वका लागि विगतमा थामी नसक्नु भीड हुने गरेको भए पनि अहिले त्यस्तो अवस्था नरहेको वैश्यले बताए ।

सस्तोको लोभमा कैयौँ ग्राहक दैनिक रुपैडिया जान्छन् । तस्करी गर्नेहरू त्यसैमा मिसिन्छन् । मूल्यमा नेपालगन्ज र रुपैडियामा ठूलो अन्तर भने हुँदैन । रिक्सा भाडा, नेपाल र भारतीय सुरक्षाकर्मीको चेकजाँचको टन्टा हेर्ने हो भने नेपालगन्ज र कोहलपुरमै सामान किन्नु धेरै राम्रो भएको सुनाउँछिन्, नेपालगन्ज–१२ की बर्षा पोखरेल । उनी भन्छिन्,– ‘चर्को घाममा जमुनाहा र रुपैडियामा घण्टौँ लाइन लागेर त्यहाँ जानुभन्दा नेपालगन्जमै सामान किन्नु ठीक ।’

नेपालगन्ज उद्योग वाणिज्य संघले केही दिनअघि नाकामा गएर स्वदेशमै किनमेल गर्न भन्दै प्रचारात्मक अभियान सुरु गरेको थियो । तर त्यसले खासै ग्राहकलाई छेक्न सकेन । अहिले पनि नाकामा भीड उस्तै छ । नेपालगन्ज भन्सारका कर्मचारी र सुरक्षाकर्मीले कडाइ गरे पनि रोक्न सक्ने अवस्था छैन । झन् लामो लाइनका कारण नाका अस्तव्यस्त बनेको छ ।

नेपालगन्ज उद्योग वाणिज्य संघका महासचिव भिम रानाभाट पनि रुपैडियामा नेपाली ग्राहकहरू गएका कारण नेपालगन्ज, कोहलपुरलगायतका स्वदेशी बजार सुनसान देखिएको बताउँछन् । ‘स्वदेशमै किनमेलको वातावारण निर्माण नगर्दासम्म यस्तै हुन्छ । तर हामीले सधैँ यस्तो हुन दिनुहुँदैन । सरकारले स्पष्ट नीति बनाएर केही न केही गर्नैपर्छ,’ उनले मिसन टुडेसँग भने ।

बाँकेकै जस्तो हालत छ बर्दियाका व्यापारीहरूको पनि । विशेषगरी भारतीय सीमाक्षेत्र नजिकका नेपाली बजारहरू यतिबेला सुनसान छन् । बाँसगढी नगरपालिका र बढैयाताल गाउँपालिकाका प्र्रमुख बजारहरू बाँसगढी, मैनापोखर शितलाबजारलगायतमा दसैँ सुरु भइसक्दा पनि आशातीत व्यापार हुन नसकेको व्यापारीहरूको गुनासो छ ।

नेपाली ग्राहकहरू चाडबाडका लागि अत्यावश्यक सामान खरिद गर्न लौकाही, बलैगाउँजस्ता सीमा क्षेत्रका भारतीय बजारतिर जाने गरेका छन् । ‘मानिसले अहिले अति आवश्यक सामानबाहेक किनमेल नै गर्न छोडे,’ बाँसगढी उद्योग वाणिज्य संघका अध्यक्ष बद्रीनाथ बराल भन्छन्– ‘तीन चार जना मिलेर एउटा अटो बुक गर्छन् र किनमेलका लागि बलैगाउँ वा लौकाही जान्छन् । उनीहरूका लागि घुमफिर जस्तो पनि हुने, किनमेल पनि हुने ।’

सीमाक्षेत्रका नेपालीहरू घरायसी किनमेलका लागि भारतीय बजारतिर ओइरिन थालेपछि व्यापारीहरूले यसमा पनि भन्सार कर लगाउनुपर्ने आवाज उठाउन थालेका छन् । ‘एकातिर सरकारको राजस्व घाटा भइरहेको छ, अर्कातिर नेपाली व्यापारीलाई मार परिरहेको छ,’ राम फेन्सी बाँसगढीका रामबहादुर बुढाथोकी भन्छन्, ‘घरायसी प्रयोजनका किनमेलमा पनि केही मात्रामा भए पनि सरकारले कर लगाउनुपर्छ ।’

प्रकाशित मितिः सोमवार, अशोज २९, २०८०     12:30:55 PM  |