मधुर पौडेल । बर्दिया ।
बर्दियाको बाँसगढीमा माक्स एन फुड बैंकको उद्घाटन गरिएको छ । युवा सञ्जाल बाँसगढीले सञ्चालनमा ल्याएको फुड बैंकको एक कार्यक्रमका बीच मंगलबार बाँसगढी नगरपालिकाका प्रमुख सालिकराम अधिकारीले उद्घाटन गरेका थिए । ‘हुनेले दिएर जाआंै, नहुनेले आएर लैजाऔं’ भन्ने नाराका साथ फुड बैंकको उद्घाटन गरिएको हो ।
फुड बैंकको उद्घाटन गर्दै नगर प्रमुख अधिकारीले यस्ता सामाजिक कामहरुमा सबैंले अग्रसरता देखाउनुपर्ने बताएका थिए । ‘बाँसगढीका युवाहरुले ल्याएको यो कार्यक्रम एकदमै सह्रानिय रहेको छ’ उनले भने, ‘महामारीको बेला सरकारको मात्र मुख ताकेर हुँदैन । सबैले आफ्नो ठाउँबाट सक्ने सहयोग गर्नुपर्छ । ‘उद्घाटन समारोहमा बोल्दै नगर उप–प्रमुख सुष्मा चौधरीले व्यवस्थित तरिकाले फुड बैंक सञ्चालन गर्नुपर्नेमा जोड दिइन् ।
उद्योग बाणिज्य बाँसगढीका अध्यक्ष राम सिंह थारुले युवाहरुले गरेको कार्यमा सधैं सहयोग हुने बताए । सोही अवसरमा अत्यन्तै निम्न आय भएका परिवारहरुलाई राहत समेत दिइएको युवा सञ्जाल बाँसगढीका अध्यक्ष एकनारायण अधिकारीले जानकारी दिए । उनले कोरोना महामारीका कारण बाल श्रममा परेका, निम्न आय भएका परिवार जसले एक छाक टार्न सकिदैन उनीहरुलाई लक्षित गरेर फुड बैंकको स्थापना गरिएको बताए ।
कार्यक्रमको उद्देश्यले यस्ता परिवारको केही भएपनि छाक टार्न सकियोस् भन्ने उद्देश्य रहेको छ । मंगलबार प्रति परिवार ३ किलो चामल, १ पोका तेल, १ किलो दाल, १ वटा साबुन, १ पोका नुन, स्वाबिन आधा किलो, १ वटा माक्स वितरण गरिएको अध्यक्ष अधिकारीले जानकारी दिए । मंगलबार मात्रै २ सय बढी घर परिवारलाई राहत बाँडिएको थियो ।