कोहलपुर ।
नेपाल तरुण दल बाँकेले अमेरिकन अटोमेटिक पेस्तोलसहित आफ्ना नेता कार्यकर्ता पक्राउ परेको विरोधमा कोहलपुर चौराहामा चक्काजाम गरेको छ । नेपाली काँग्रेसका नेता कार्यकर्ता जम्मा भएर यातायात अवरुद्द पारेका हुन् ।
उनीहरुले आफ्ना नेता तथा कार्यकर्तालाई प्रहरीले फसाएको भन्दै सरकार र प्रहरीविरुद्द चर्का नाराबाजी गरिरहेका छन् । नेपाल दरुण दल नेपालगञ्ज नगरका सभापति सन्दीपजंग शाह लगायतलाई बिहीबार राति अत्याधुनिक हतियारसहित कोहलपुर प्रहरीले पक्राउ गरेको थियो । सोहीको विरोधमा तरुण दल बाँकेले चौराहामा प्रदर्शन गरेको हो ।
कोहलपुर प्रहरीले जानकी गाउँपालिका ६ गनापुरमा रहेको नमस्ते भिलेज रिसोर्टबाट अत्याधुनिक पेस्तोल र सोमा लाग्ने गोली तरुण दलका ६ जना नेता कार्यकर्तालाई पक्राउ गरेको थियो ।
रिसोर्टको पूर्वतर्फ पार्किङ गरिरहेको बा १८ च ४२११ नम्बरको मारुती सुजुकी कारको बायाँतर्फको सिटमा फल्ट बटम बनाई लुकाइछिपाइ राखेको अवस्थामा अटोमेटिक पेस्तोल एक थान र दुई राउन्ड गोली लोड गरिराखेको म्यागेजिनसहित उनीहरुलाई नियन्त्रणमा लिएको हो ।
उपमहानगरपालिका–१३ निवासी तरुण दल नगर सभापति शाह निर्माण व्यवसायीसमेत हुन् ।
तरुण दलका नेता कार्यकर्ताले सडक अवरुद्द पारेपछि यातायात साधनहरु भने चल्न सकेका छैनन् । कोहलपुर प्रहरीले अवरुद्द सडक खुलाउने प्रयास भइरहेको जनाएको छ ।